Бу күннэргэ Төрүт нэһилиэгин С.М. Егоров аатынан бибилэтиэкэ Арассыыйаҕа — Дьиэ кэргэн, Саха сиригэр — Оҕо сылларыгар аналлаах «Мин төрүччүм» диэн бырайыагы үлэлэтэн саҕалаата.
Бырайыак ааптара — бибилэтиэкэ сэбиэдиссэйэ Нина Чачуа бэйэтэ толкуйдаан олоххо киллэрбит сонун сүүрээнин туһунан бу курдук билиһиннэрдэ:
— Биһиги нэһилиэкпитигэр элбэх оҕолоох, сиэннээх ытык кырдьаҕас үгүс. Сиэн оҕолор эбээлэригэр өрүү сылдьаллар, көмөлөһөллөр. Бу бырайыак икки хайысхалаах: бастатан туран, кыраайы үөрэтиигэ сыһыаннаах. Оҕолорго төрөөбүт нэһилиэктэрин устуоруйатын сырдатыы. Иккиһинэн, бэйэлэрин төрүччүлэрин билэ улааталлар. «Мин төрүччүм» бырайыак — сиэн эбээтин кытта кэпсэтиитэ. Сиэн оҕо интэриэһиргээбит ыйытыыларыгар эбээтэ бэйэтин олоҕуттан ахтыы оҥорор.
Бастакы кыттааччылар — 93 саастаах элбэх оҕолоох ытык ийэ, үгүс сиэн хос-хос эбэтэ Христина Кононовна Каландарова. Тыыл бэтэрээнэ интернациональнай дьиэ кэргэн бас-көс киһитэ. Кини кэргэнэ Хаит Каландаров омугунан узбек этэ, ыалдьан күн сириттэн барбыта. Каландаровтар элбэх оҕолонон, сиэннэнэн, Төрүт нэһилиэгин биир тарбахха баттанар сис ыалын быһыытынан биллэллэр.
«Мин төрүччүм» диэн биэриигэ ытык эбээ Христина Кононовна кимтэн кииннээҕин, хантан хааннааҕын хос сиэннэригэр кэпсээтэ. Кини ийэтэ Мотрена Муоматтан, аҕалара Конон Томпоттон төрүттээхтэр эбит. Ыал буолаат, Силирикээҥҥэ олохсуйбуттар. 15 оҕону төрөппүттэриттэн алтата эрэ хаалбыт. Ийэлээх аҕалара булчут буолан, оҕолорун булдунан улаатыннарбыттар. Улахан кыыстара Христина Кононовна аҕыс оҕону төрөтөн, хос-хос сиэннэнэн, бэйэтэ этэринэн, «соҕотох бэйэм 120-чэ киһи буоллубут» диир.
«Мин төрүччүм» биэрии иккис кыттааччылара — элбэх оҕолоох ийэ, эбэ, хос эбэ, үлэ бэтэрээнэ, «Ийэ Албан аата» 2-с истиэпэннээх уордьанын кавалера, «Ийэҕэ махтал» уонна «Гражданскай килбиэн» бэлиэлэр хаһаайкалара Тамара Моисеевна Босикова сиэннэрин кытта. Тымныы полюһа Өймөкөөн Төрүтүн төрүт олохтооҕо Тамара Моисеевна сиэннэригэр ийэтин уонна аҕатын туһунан кэпсээтэ, чугас аймахтарын хаартыскаларын көрдөрө олорон билиһиннэрдэ.
Үһүс биэриигэ педагогическай үлэ бэтэээнэ Акулина Арьяновна Егорова кыттыыны ылыаҕа. Кини сиэннэригэр эмиэ төрүччүлэрин билиһиннэриэҕэ. Ити курдук, нэһилиэкпит кырдьаҕастара сиэннэрин кытта көрсөн, «Мин төрүччүм» биэриигэ көхтөөх кыттыыны ылыахтара.
Биллэн турар, бу сонун бырайыак нэһилиэк олохтоохторун биллэ сэргэхситтэ. Кырдьаҕастар хаартыскаларын альбомун ылан, эдэр саастарыгар төннөн ыллылар, оттон оҕолор аймахтарын туһунан бэрт элбэҕи биллилэр.
Елена Потоцкая