Олох биэрбит Кучу сибэккитэ

Мин ийэм айылҕаны, сибэккини олус таптыыра.

Саас ньургуһунтан саҕалаан ханнык сибэкки тыллыбытын кэпсиир буолара. Ону мин булаары, көрөөрү көрдүү барарым. Аны ханнык сибэккини туттан эчэйиини оһороллорун, ханнык үүнээйи эмкэ туттулларын кэпсиирэ.

Биһиги табаһыт, көс омуктарбыт. Сайыннары, кыһыннары табаларбытын батыһан көһөрбүт. Сайын аайы ийэм чуолаан биир сибэккини хомуйан, сүрдээх кичэллээхтик куурдан хатарарын бэлиэтии көрөрүм. Хатаран баран, маҥан сиидэс таҥаска суулаан уурунара.

Биир сайын ийэбиттэн кини тоҕо наар ити сибэккини уурунарын ыйыппыппар маннык кэпсээбитэ: “Бу сибэкки кучу диэн. Аҕа дойду сэриитин кэмигэр дьоҥҥо элбэхтэ туһалаабыт үүнээйи. Ол саҕана ыалга лимит 1 пачка чэй, 10 киилэ бурдук бэриллэрэ. Мин сайын кучуну сыыстаан, хатаран чэй оҥосторум. Сорохтор саатыкаан угунан чэй оҥостоллоро. Эбэм миэхэ кыра эрдэхпинэ бу сибэккини хомуйтарар этэ. Бурдугу сиэбэт буолан, ону сахаларга үрүҥ аска атастаһарым. Булчут буоламмын лимиитим арыычча улахан этэ. Сорохторго олохтомуттааҕар өссө кыра этэ. Бу сибэкки миигин быыһаабыт сибэкким буолар, ол  иһин кэриэстээн сыл аайы хомуйан уурунааччыбын”.

Ол иһин билигин кучуну көрдөхпүнэ ийэм олоҕо харахпар көстөн кэлэр. Кини бурдук аһы кырдьык сиэбэт этэ. Ыалга сырыттаҕына алаадьы, бэрэски бэристэхтэринэ кумааҕыга суулаан аҕалан миэхэ биэрэрэ. Оннук дьон күндүлээбитин өһүргэтимээри ылан кэлэрэ.

Дьиҥнээх кучу үрэххэ чэй тааска үүнэр. Сэбирдэҕэ халыҥ, туттаххына уулаах курдук буолар. Хонууга үүнэр кучу “куруҥ от” дэнэр. Кучу — Иван-чай,  куруҥ ото — Кипрей.

Екатерина Таркова, элбэх оҕолоох ийэ, СӨ Суруйааччыларын сойууһун чилиэнэ,

норуот маастара, Сордоҥноох

Читайте дальше