Өймөкөөн нэһилиэгин Биэрэк Үрдэ учаастагын биир тутаах олохтооҕо, суоппар Валерий Егорович Софронов олоҕун айан аартыгар, көлүөһэ үрдүгэр анаабыта. Кини тимир көлөнү иннин ылбыттартан биирдэстэрэ, уопуттаах суоппар, улахан дьиэ кэргэн туллар тутааҕа, тапталлаах эһэтэ буолар. Валерий Егорович массыына уруулун туппута 57 сылыгар барда. Билигин кини Биэрэк Үрдүгэр “Теплоэнергосервис” тэрилтэтигэр силиэсиринэн үлэлиир.
Валерий Егорович бэйэтин, үлэ-хамнас туһунан биһиги кэрэспэдьиэммитигэр маннык кэпсээтэ.
— Мин Өймөкөөн улууһугар күтүөппүн. Бэйэм Таатта улууһуттан төрүттээхпин. 1978 сыллаахха Өймөкөөҥҥө кэлбитим. Эһиилигэр сүрэҕим аҥарын көрсөн ыал буолбутум. Бастаан Биэрэк Үрдүгэр хотоҥҥо торбос көрөөччүнэн үлэлээбитим. Онтон кэлин үүт таһар массыынаҕа олорбутум, ыраах учаастактарга үлэлиир сылгыһыттарга, булчуттарга бородуукта тиэйэр этим.
Мин баай киһибин, 6 оҕолоохпун, 15 сиэн, 1 хос сиэн эһэтэ буолабын. Билигин 6 төбө ынахтаахпын, кыһыннары-сайыннары кинилэрдиин бодьуустаһабын. Иллэҥ кэммэр отоннуубун, бултуубун, массыына хасыһабын.
Суоппар идэтин баһылыыр оҕо эрдэҕинээҕи баҕа санаам этэ. Ол саҕана суоппар идэтэ нууччалыы эттэххэ, олус престижнэй этэ. Эдэр ыччат бары суоппар буолуон баҕарара.
Учаастакка үлэлии-хамсыы сырыттахпына миигин “Өймөкөөн” сопхуоска суоппарынан ыҥырбыттара. Дьэ онтон саҕаламмыта ыраах айаҥҥа сырыым. «ЗИЛ 133» диэн массыынаны арааматыттан саҕалаан хомуйан, сүүрэр массыына оҥорбутум. Бииргэ үлэлиир уолаттарым онтон олус сөхпүттэрэ.
Ол массыынабар үлэлии сылдьан “Өймөкөөн” сопхуос чөмпүйүөн суоппара буола сылдьыбытым. Оччолорго сопхуос ыраах айаҥҥа сылдьар суоппардара 40-ча буолан эн-мин дэсиһэн олус эйэлээхтик үлэлээбиппит.
Мин бастакы ыраах айаммын бу бэҕэһээ курдук өйдүүбүн. Хаандыгаҕа айаннаабытым, сирдьитинэн Иван Винокуров барсыбыта, киниттэн элбэҕи билбитим-көрбүтүм. Кини араас быһылааннары кэпсээбитэ, суолга ханна сэрэхтээх, болҕомтолоох буолары көрдөрбүтэ, кэпсээбитэ. Билигин Иван Егорович Аартык бөһүөлэгэр олорор. Сибээспитин билиҥҥээҥҥэ диэри тутабыт. Киниэхэ махталым муҥура суох.
Мин уопсайа 25 сыл дальнобойщиктаабытым. Бу сыллар тухары араас буолбута, элбэҕи көрбүтүм. Бииргэ үлэлээбит уолаттарбынаан өрүүтүн билсэбит, сыл аайы төһө да аҕыйаатарбыт, көрүстэрбит эрэ уруккуну истиҥник ахтан-санаан ылабыт. Биэрэк Үрдүгэр Валентин Васильев, Томторго Геннадий Дягилев, Гаврил Дьячков, Николай Запивалов, Александр Егоров, Александр Колесов, Леонид Сивцев, Үчүгэйгэ Гаврил Винокуров, Сордоҥнооххо Иннокентий Аммосов бааллар. Бу уолаттардыын, ыраах айан суолун өрө туппуппут, Өймөкөөн аатын ааттаппыппыт.
Бу туһунан сиһилии “Хотугу сардаҥа” хаһыакка ааҕыҥ.
Ольга Скрыбыкина