Соторутааҕыта Дьокуускайга «Историческай өйдөбүнньүк» Федеральнай партийнай бырайыак уопсастыбаннай сүбэтэ көрсүһүү тэрийдэ. Мунньаҕы Ил Түмэн дьокутаата Елена Голомарева уонна үөһэ ыйыллыбыт сүбэ бэрэссэдээтэлэ Саргылана Неустроева иилээн-саҕалаан ыыттылар.
Сүбэ үлэтин биир сүрүн хайысхатынан биир дойдулаахпыт, аатырбыт меценат-атыыһыт Н.О. Кривошапкин үтүө аатын үйэтитии буолар. Көрсүһүүгэ кыраайы үөрэтээччи, элбэх кинигэ ааптара Т.Е. Васильева тэрээһин сүрүн сыалынан Н.О. Кривошапкин аатын сүгэр Өймөкөөн орто уонна Дьокуускайдааҕы 5 нүөмэрдээх оскуолалары кытта сибээс, ситим олохтооһун буоларын чопчулаата.
Е.Х. Голомарева атыыһыт Кырбаһааҥкын аатын үйэтитии хайҕаллаах, үтүө дьыала буоларын бэлиэтээн туран, үлэ былаана торумнаннаҕына бу хамсааһыны өйүөҕүн туһунан биллэрдэ. «5 №-дээх оскуола киин куоракка өрүү инники күөҥҥэ сылдьар, атыттарга холобур буолар бастыҥ үлэлээх үөрэх тэрилтэтэ”, — диэтэ кини.
5 №-дээх оскуола түмэлин үлэһитэ А.Н. Борисова 2020 сылтан оскуолатын устуоруйатын дириҥэтэн үөрэтэ сылдьар. Кини бу хайысхаҕа чинчийэр үлэни ыытар, ыстатыйалары суруйар эбит. Педагог ахсынньыга 2 кинигэни (бастакыта — Дьокуускайга үөрэхтээһин сайдыытын туһунан, иккиһэ — 5 №-дээх оскуола летопиһа) бэчээккэ таһаарар былааннаах. Биһигини национальнай бибилэтиэкэҕэ ити кинигэлэри сүрэхтиир тэрээһиҥҥэ ыҥырбытын сэҥээрэ иһиттибит.
Өймөкөөн улууһун Дьокуускайдааҕы сүбэтин бэрэссэдээтэлэ Р.П. Кондакова Өймөкөөн нэһилиэгин “Райотдел” учаастагар баай Кырбаһааҥкын дьиэтигэр 7-8 сааһыттан улаатыар диэри олорбутун кэпсээтэ. Быйыл ити балаҕан дьиэтэ сөргүтүллэн, саҥалыы тыыны ылбытыттан долгуйбутун, олус үөрбүтүн туһунан эттэ. Роза Петровна бу балаҕан үлэҕэ киириитигэр Өймөкөөн орто оскуолатын кэлэктиибэ улахан көмөнү оҥорбутун, сыратын уурбутун бэлиэтээтэ.
Манна даҕатан эттэххэ, Кырбаһааҥкын олорбут дьиэтэ түмэл буолуоҕуттан бэрт элбэх киһини түмтэ. Ол курдук, манна 400 киһи сырытта диэн оскуола үөрэтэр үлэҕэ сэбиэдиссэйэ А.Г. Винокурова эппиттээх.
Түмэлгэ сылдьыбыт киһи барыта кута-сүрэ тохтоон, олус астынан, былыргы экспонаттары көрөн, дьиэ хаһаайынын туһунан билиилэрэ хаҥаан бараллар. Махталларын, баҕа санааларын аналлаах альбомҥа суруйан хааллараллар.
Мустубут дьон бары ытыктыыр киһибитигэр Тамара Егоровна Васильеваҕа улууспут туһугар олус улахан суолталаах үлэни элбэх сыл устата ыыта сылдьарын иһин барҕа махталбытын биллэрдибит.
Икки үйэ силбэһэр быыһыгар олорон ааспыт, Өймөкөөн аатын-сураҕын киэҥник аатырдыбыт, сырдык, үтүө дууһалаах киһибит аатын үйэтитэргэ күүспүтүн, өйбүтүн-санаабытын түмэн үлэлиэҕиҥ!
Бу туһунан сиһилии “Хотугу сардаҥа” хаһыакка ааҕаарыҥ.
Тамара Винокурова, улуус хаһыатын общ.корр., Дьокуускай