Бу күннэргэ Өймөкөөн улууһун кыраайы үөрэтээччитэ, эдэр учуонай, биһиги киэн туттар биир дойдулаахпыт, биология билимин кандидата Спиридон Слепцов «Материалы к генеалогии населения Оймяконья (конец XVIII – первая треть XX в.)» диэн саҥа кинигэтэ күн сирин көрдө.
Спиридон Слепцов кинигэлэрин аахпатах, илиитигэр туппатах киһи диэн суоҕа да буолуо. Кини Өймөкөөн улууһун баай устуоруйатын үөрэтэр, киэҥ эйгэҕэ таһаарар дьонтон биирдэстэрэ. Спиридон Слепцов хас биирдии үлэтэ кэлэр кэнчээри ыччакка оруола улахан.
Саҥа тахсыбыт кинигэҕэ СӨ Национальнай архыыбын матырыйаалларыгар олоҕуран Өймөкөөннөөҕү Вознесенскай уонна Сеймчааннааҕы Николаевскай таҥара дьиэлэрин дириҥ устуоруйалара киирдэ. Бу таҥара дьиэлэригэр үлэлээбит дьон туһунан сиһилии матырыйаал эмиэ баар. Кинигэҕэ Өймөкөөн улууһун төрүччүлэрин туһунан матырыйааллар уонна докумуоннар бааллар. Ааптар сүрүннээн Өймөкөөннөөҕү таҥара дьиэтин үлэтин киэҥник сырдатта.
Саҥа кинигэ туһунан Наталья Громова, Үчүгэй нэһилиэгин бибилэтиэкэрэ санаатын үллэстэр:
— Спиридон Слепцов саҥа, “буруолуу” сылдьар кинигэтин тутан олус үөрдүм. Хайдахтаах улахан дириҥ үлэни ыыппытын сөхтүм. Мин бу кинигэттэн аҕам өттүнэн эбэм Тарын Үрэхтэн төрүттээҕин биллим. Ийэм өттүнэн дьоммун эмиэ буллум. Бу кинигэнэн сирдэтэн төрүччүбүн оҥосторго быһаарынным. Кинигэ Өймөкөөн олохтоохторо төрүччүлэрин үөрэтэллэригэр бэлэм матырыйаал буолбут диэн үөрэбин. Спиридон Слепцовка улахан махталбын тиэрдэбин!
Иван Львович Винокуров, биэнсийэлээх, Үчүгэй:
— Спиридон Слепцов кинигэтин анаан-минээн сакаастаан ыллым. Олус интэриэһинэй кинигэ диэн сыаналаатым. Оҕолорбор, сиэннэрбэр удьуордарбытын үөрэтэрбитигэр хайаан да туһалыа диэн бигэ эрэллээхпин.
Хас биирдии киһи удьуор утумун билиэхтээх. Дьонун-сэргэтин билбэт киһи силиһэ быстыбыт үүнээйи кэриэтэ буолар. Төрдүн-ууһун билиитэ кини киһи быһыытынан силигилии үүнэн тахсарыгар тирэх буолар. Онон, Спиридон Слепцов кинигэтинэн сиэттэрэн элбэх киһи төрүттэрин үөрэтэн саҕалыа диэн бигэ эрэллээхпин.
Бу туһунан сиһилии “Хотугу сардаҥа” хаһыакка ааҕаарыҥ.
Ольга Скрыбыкина