Өймөкөөн олоҥхоһутун Махсыым Омуоһап сыдьааннара Сордоҥноохторун нэһилиэгэр муһуннулар

Соторутааҕыта Өймөкөөн улууһун устуоруйатыгар бигэтик киирбит олоҥхоһут Аммосов Максим Филиппович сыдьааннара улууска үрдүк таһымнаахтык ыытыллыбыт Олоҥхо Ыһыаҕын иитинэн Сордоҥноох сиригэр-уотугар көрсөн, чулуу эһэлэрин кэриэстээн, кини сырдык аатын ахтан-санаан аастылар.

Сэһэн Боло Махсыым Омуоһап “Дугуйа Бөҕө” диэн олоҥхотун сурунан ылбытынан үйэлэргэ киэн туттар сиэннэртэн биирдэстэрэ, дириҥник убаастанар улуус олохтооҕо, сибээс бэтэрээнэ Раиса Винокурова тэрээһин туһунан сырдатта:

Эбэлээх эһэбит Ульяна Егоровна уонна Максим Филиппович 13 оҕолоруттан оччотооҕу кытаанах усулуобуйаны тулуйбакка 5 оҕо эрэ хаалбыт эбит. Элэгэнтэй – Иннокентий Максимович,  Дэбдэ – Евдокия Максимовна, Былаас – Влас Максимович, төрдүс оҕо мин ийэм Варвара Максимовна уонна кыралара Мотрена Максимовна үүнэн-улаатан, биһиги аймаҕы тэниттэхтэрэ.

Бу сайын биһиги аймах хаһан даҕаны мустубатахпытын муһуннубут. Ол курдук ыраахтан-чугастан: Дьокуускайтан, Уус Алдантан, Ньурбаттан, Горнайтан сиэннэрэ, хос сиэннэрэ, хос хос сиэннэрэ төрөөбүт түөлбэлэригэр Сордоҥнооххо кэлитэлээтилэр.

Олоҥхо Ыһыаҕа ыһыллар сыла үүммүтүн кэннэ биһиги аймах, Олоҥхоһут Омуоһап сыдьааннара, сомоҕолоһон, үп хомуйарга быһаарыы ылыммыппыт. Онон  чулуу эһэбитин Максим Аммосовы үйэтитэр сыаллаах мемориальнай дуоска сакаастаан нэһилиэкпит, улуус дьоно-сэргэтэ көрө сылдьарыгар көстөр сиргэ туруорар сыаллаах толкуйдаабыппыт. Бу туһунан нэһилиэк баһылыгар Альберт Вензелгэ тахсыбыппытыгар тута сөбүлэһэн, мемориалы үөрүүлээх быһыыга-майгыга Сордоҥнооххо баар “Арчы” дьиэтин таһыгар ыйаатыбыт. Маныаха Альберт Вензельгэ уонна улуустааҕы Култуура управлениетын начаалынньыгар Аксиния Сивцеваҕа махтанабыт.

Нэһилиэк баһылыга Альберт Николаевич кэлэр сылга бөһүөлэккэ “Умнуллубат ааттар” диэн искибиэр оҥоһуллуохтааҕын санатан туран, онно биһиги эһэбит сырдык аата эмиэ киллэриллэрин туһунан эппитин үөрэ-көтө истибиппит.

От ыйын 5 күнүгэр Өймөкөөн олоҥхоһутун М.Ф. Аммосов аймахтара Сордоҥноох нэһилиэгин “Арчы” дьиэтигэр муһуннулар. Максим Филиппович удьуордара кэҥээн, дириҥээн иһэр буолан, билигин сиэннэр төрдүс көлүөнэлэригэр тиийдилэр. Ол туһунан оҕонньор биир сиэнэ Клавдия Константиновна оҥорбут аймахтар Аал луук мастарыгар арылхайдык көстөр.

Онон улахан уруу-аймах буолабыт. Тэрээһиҥҥэ өссө кийииттэр, күтүөттэр кыттыбыттара кэрэхсэбиллээх, — диэн үөрэ-көтө сырдатта Раиса Константиновна. — Тэрээһиммитин эһэбитигэр аналлаах мемориальнай дуосканы аһыы сиэриттэн-туомуттан саҕалаабыппыт. Ону улахан сиэн кыыс, эдьиийдээтэр эдьиийбит, култуура туйгуна Светлана Семеновна Попова арыйан баран, сиэри-туому тутуһан, сыт таһааран кутаа уоппутун аһатан, арчылаабыта. Алгыс тылы Аксинья Аммосова толорбута. Кини эһэбитин удьуордаан кылыһахтаах куоластаах. Алгыс кэмигэр тойуктаабытын бары астына истибиппит.

Толору астаах сандалабыт тула олорон ис дууһаттан-кэпсэтэн, бэйэ-бэйэбитин истиҥник эҕэрдэлэһэн ахтылҕаммытын таһаарбыппыт. Музыкальнай эҕэрдэлэри истэ олорон мин эһэм талба талаана, айылҕаттан айдарыылааҕа сыдьааннарыгар сүрдээҕин бэриллибит эбит дии санаабытым.

Дьэ, ити курдук, улууска ыытыллыбыт Олоҥхо Ыһыаҕын чэрчитинэн, уруулар көрсүһүүлэрин курдук сэргэх тэрээһиннэр быыстала суох буоллулар, аймахтыылар мустан төрөөбүт дойдуларыгар ахтылҕаннарын таһаардылар.

 Бу туһунан сиһилии “Хотугу сардаҥа” хаһыакка ааҕаарыҥ.

Любовь Кривошапкина

Читайте дальше