Сэрии ыар сылларыгар Тарын-Үрэх нэһилиэгэр «Кыһыл Сулус» колхуос бэрэссэдээтэлэ Алексей Прокопьевич Кривошапкин, «Калинин» колхуос бэрэссэдээтэлэ Афанасий Артамонович Атласов дьону-сэргэни бииргэ түмэн, сатабыллаахтык салайан, үрдүктэн үрдүк көрдөрүүлээх үлэлэринэн күн бүгүнүгэр тиийэ үтүө ааттара ааттанан кэллэ.
Тарын-Үрэх нэһилиэгиттэн Бүтүн Сойуустааҕы Тыа хаһаайыстыбатын Быыстапкатыгар (Москуба куоракка) кыттыбыт чулуу дьоммутуттан биирдэстэринэн Корякин Гаврил Николаевич-Хабдьыкаан буолар.
Хабдьыкаан туһунан тус бэйэм оҕо эрдэхпиттэн ийэлээх аҕам кэпсээннэриттэн истэн-билэн улааппытым. Ол эрээри «Хабдьыкаан» диэн эрэ аатынан уонна Корякина Настаалаах, Шуралаах, миигин кытта үөрэммит Коля уонна Валя эһэлэрэ диэн билэрим.
Валентина Прокопьева эһэтин туһунан Атласов Дмитрий Николаевич кэпсээбитин маннык сырдатар:
— Төрүккэ Атласова Азалиялаахха сырыттахпына аҕалара Атласов Миичээ эһэбин бэркэ билэрин, бииргэ ыстаадаҕа сылдьыбытын кэпсиирэ. Кини эһэм Хабдьыкаан булчутунан тэҥнээҕэ суоҕун, сыыдамын, кыахтааҕын астына ахтара. Эһэм улаханнык ис дууһатыттан күлэрин ааһан, ол тэҥэ кыыһырдаҕына-сөбүлээбэтэҕинэ тутатына кими баҕарар оннун булларарын, уордайдаҕына бэстэлиэт да үрдүгэр түһэрин кэрэйбэтин эмиэ саныыра. “Эһэҕит көрүдьүөс баҕайы киһи этэ, наар дьээбэлэнэр идэлээҕэ. Биирдэ сыарҕатыгар толору хабдьылардаах айаннаан иһэн, онтулара түһэн хаалбыттарын көрөн уордайан: “Күүлэйдии барар сиргитигэр ситэри барыҥ”, — диэт, сыарҕатын туох баарын барытын таҥнары туппутун кэпсээн, урукку кэмин санаан, Миичээ күлэрэ.
Арааһа, манна даҕатан эттэххэ, ити хабдьылардаах түбэлтэ кэнниттэн Гаврил Ньукулаайабыһы дьоно-сэргэтэ Хабдьыкаан диэн ааттаатахтара буолуо.
Гаврил Николаевич Корякин киэҥ тайҕанан сылдьыбыт, Тарын-Үрэх нэһилиэгин тумус туттар булчуттарыттан биирдэстэрэ этэ. Сылтан сыл аайы былаанын куоһаран, хайҕал-чиэс ортотугар сылдьыбыт киһи.
Корякин Г.Н. эйэлээх олох бастакы сылларыгар (1946-1950 сс.) чулуу үлэһиттэргэ туттарыллыбыт «1941-1945 сс. Аҕа Дойду Улуу сэриитигэр килбиэннээх үлэтин иһин” мэтээлинэн (Сталин төбөлөөх) наҕараадаламмыта.
Бу туһунан сиһилии “Хотугу сардаҥа” хаһыакка ааҕыҥ.
Зоя Оконешникова, кыраайы үөрэтээччи, Төрүт