Попов Максим Петрович 1945 сыллаахха сэтинньи 25 күнүгэр Үчүгэй нэһилиэгэр элбэх оҕолоох ыалга игирэ быраатынаан күн сирин көрбүттэрэ. Игирэтин аҥаара мөлтөх доруобуйалаах буолан 1 сааһын ааһан баран, ыалдьан өлбүт.
Махсыым кыра эрдэҕиттэн олус тэтиэнэх, күүстээх-уохтаах буола улаатар. Оскуолаҕа сылдьан тустууга тэҥнээҕин булбата эбитэ үһү. Хаста да өрөспүүбүлүкэҕэ улууһун чиэһин ситиһиилээхтик көмүскээбитэ. Ол да иһин буолуо, салайааччы буолан баран эдэр спортсменнары баралларыгар-кэлэллэригэр үгүстүк өйүүрэ, күрэхтэһиигэ бириискэ спонсордыыра. Эрдэттэн ону-маны оҥорор баҕалаах буолан, 9-с кылааска үөрэнэ сылдьан бастаан өйөнөрдөөх ыскамыайка, онтон улахан иһит ыскаабын эдьиийинээн Елена Петровналыын бэйэлэрэ оҥорбуттара бу күҥҥэ дылы Өймөкөөҥҥө олорбут дьиэлэригэр турар.
Максим оскуола кэнниттэн тута аармыйаҕа баран ытык иэһин төлөөн кэлбитэ. Онтон суоппар идэтигэр үөрэнэн Өймөкөөҥҥө суоппарынан үлэлиир. Сотору буолаат, күүстээх, күдэхтээх эдэр суоппарга улахан массыынаны эрэнэн, кинини ыраах айан суоппарынан туруораллар. Ол кэмҥэ Максим Петрович Халыма суолун тэлэн, Магадан — Дьокуускай икки ардыгар түүннэри-күнүстэри айаннаан, уопутуран, уос номоҕор сылдьар чулуу суоппар буолар.
Ол кэмҥэ оскуолаттан ыла табаарыстаспыт, оскуола саамай кыраһыабай кыыһынаан Мурашкина Галина Ивановналыын ыал буолан, икки кыыстаах уол оҕону төрөтөн, дьоллоохтук олорбуттара.
Хомойуох иһин, тус олохторо сатамматаҕа, икки оҕолоро, кэргэнэ олохтон эрдэ туораабыттара.
Билигин соҕуруу икки сиэн уолаттара уонна хос сиэн кыыһа этэҥҥэ олороллор.
Максим Петрович 35 сааһыгар оһолго түбэһэн аҥар атаҕын былдьатыаҕыттан, суоппардаан бүтэн, “Өймөкөөн” сопхуос автопаркатын инженер-механигынан ананан ситиһиилээхтик үлэлээбитэ. Өр сылларга дириэктэри хаһаайыстыбаннай чааска солбуйааччынан үлэлээбитэ.
М.П. Попов 1997-2003 сылларга “Өймөкөөн” ГУП дириэктэринэн ананан үлэлиир.
Онтон Суолу харайар учаастак начаалынньыгын солбуйааччытынан үлэтин түмүктүүр.
Өр сыллаах үтүө суобастаах, ситиһиилээх үлэтин иһин үгүстэ өрөспүүбүлүкэ, улуус таһымнаах наҕараадаларынан, сыаналаах бэлэхтэринэн, бэлиэлэринэн бэлиэтэммитэ, Өймөкөөн улууһун бочуоттаах олохтооҕо буолбута.
Биһиги, аймахтара, билигин үгүс дьон Максим Петрович көмөлөспүтүн, өйөөбүтүн туһунан үтүөтүк ахталларын үөрэ-махтана истэбит.
Люция ЕГОРОВА, Томтор