Саха сиригэр кыстыгы этэҥҥэ туоруурбут туһугар олох-дьаһах коммунальнай хаһаайыстыбатын үлэһиттэрэ күннэри-түүннэри түбүгүрэллэр. Онно үчүгэй материальнай-техническэй хааччыллыы, кэмиттэн кэмигэр үөрэнии, өйдүүр-кыһаллар салалта барыта төһүү буолаллар.
Хаһыаппыт бүгүҥҥү ыалдьыта – Томтор нэһилиэгин Куйдуһун учаастагын хочуолунайыгар маастарынан үлэлиир соҕотох кэрэ аҥар Л.И. Карпова. Людмила Ивановна маастарынан үлэлээбитэ номнуо 11 сыл буолла. Кини үлэтин толору баһылаабыт салайааччы, олус кыһамньылаах, сымнаҕас майгылаах, эйэҕэс, Өймөкөөннөөҕү РЭС ытыктанар, киһи эрэ холобур оҥостор киһитэ. Людмила Ивановна Үчүгэй нэһилиэгиттэн төрүттээх. Үс оҕо күн күбэй ийэтэ, тапталлаах кэргэн, түөрт минньигэс сиэн эбэтэ буолар. Кини олоҕун аргыһа Сергей Николаевич Егоров РЭС-ка өр сылларга суоппарынан үлэлээбит, билигин бочуоттаах сынньалаҥҥа олорор. Ыал улахан уола эмиэ бу тэрилтэҕэ үлэлиир, иккис уоллара Дьокуускайдааҕы ТЭЦ-ка инженер, оттон кыыстара куорат биир тэрилтэтигэр буҕаалтырдыыр. Онон Егоровтар дьиэ кэргэн бары даҕаны энергетикаҕа сыһыаннаах дьонунан буолаллар.
Людмила Ивановна үлэтин туһунан маннык кэпсээтэ:
— Мин РЭС-ка үлэлээбитим 18 сылыгар барда, 2012 сыллаахтан маастарынан үлэлиибин. Тэрилтэбит кыахтаах, салайааччыбыт Андрей Заболоцкай олус дьаһаллаах, барытын сүүрэн-көтөн булар, бириэмэтигэр үөскээбит боппуруостары быһаарар, аналлаах үлэ таҥаһынан кэмиттэн кэмигэр хааччыллабыт.
Кэлэктииппитигэр эдэр ыччат элбэх, уолаттар үлэни кыайа тутталлар, бары олус иллээхпит. Уопсайынан, кэлэктиипкэ үлэни өрө туппут дьон үлэлииллэрэ хайҕаллаах. Мин санаабар, маастар үлэтигэр саамай сүрүн хаачыстыба – ыксаллаах балаһыанньаҕа сөптөөх быһаарыыны ылыныы уонна үлэһиттэргэ суһаллык тириэрдии дии саныыбын. Мин эбээһинэспэр Куйдуһун нэһилиэнньэтин сылааһынан хааччыйыыны тэрийии, үлэ усулуобуйатын тустаах ирдэбиллэри тутуһан хааччыйыы, өрөмүөн үлэтин бириэмэтигэр ыытыы буолар. Хочуолунай үлэтэ тустаах дьонтон үрдүк эппиэтинэһи ирдиир. Ол иһин манна үлэһит, түргэн-тарҕан туттуулаах, мындыр толкуйдаах дьон үлэлииллэр диэн бэлиэтиэм этэ.
Людмила Ивановна иллэҥ кэмигэр сибэкки үүннэриитинэн дьарыктанар, үүнээйи араас көрүҥүн сөбүлээн олордор, сайынын теплицаны кытта бодьуустаһарын сөбүлүүр. Төрөөбүт дойдуга таптал, кэлэктиипкэ ытыктабыл, үлэҕэ бэриниилээх буолуу, киһиэхэ туйах хатарааччылар, дьыаланы, олоҕу салҕааччылар баар буолуулара – бу буоллаҕа үрдүк дьол диэн.
Ити курдук Людмила Ивановна Карпова салайар кэлэктиибинээн 2023 сылы этэҥҥэ туораан, саҥа дьылга ситиһиилээхтик үктэннилэр. «Биир дойдулаахтарбыт дьиэлэригэр куруутун сылаас, сырдык эрэ буоллун,» – дэһэллэр Куйдуһун хочуолунайын бэриниилээх үлэһиттэрэ.
Ольга СКРЫБЫКИНА