Томтор орто оскуолатыгар дириэктэринэн, 2-с Бороҕон нэһилиэгин баһылыгынан, Аҕыйах ахсааннаах норуоттар Ассоциацияларын бэрэссэдээтэлэ Спиридон Васильевич Слепцов туһунан өйдөбүл улууспутугар умнулла быһыытыйан эрэр дуу диэн санаа миэхэ киирэр буолла. Дьиҥэр саха норуодунай бэйиэтэ Савва Тарасов суруйбутунуу: “Күһүҥҥү киэһэлэргэ суоллар тоҕойдоругар умайар кутаа курдук дьоннор өлбөөдүйбэт сырдык ааттара бар дьон махталлаах сүрэҕэр өрүү умайа сылдьыахтаахтар”.
Соторутааҕыта дьон-сэргэ дириҥник ытыктыыр киһитэ С.В. Слепцов туһунан кэргэнэ М.П. Боярова “Умайар кутаа курдук” диэн сүрдээх долгутуулаах ахтыылары хомуйан 2004 с. таһааттарбыт кинигэтин өссө төгүл сиһилии аахтым.
Кинигэ титульнай лииһигэр Мария Поликарповна 2007 сыллаахха “Раиса Константиновнаҕа — Спиридон оҕо, эдэр сааһынааҕы доҕоругар үтүө өйдөбүл гына илдьэ сылдьаргар” диэн суруйбут эбит. Мин маннык сыанабылтан киэн тутта санаатым. Ол кэмтэн ыла номнуо балай эмэ сыл ааһа оҕустаҕа.
Кырдьык, Спиридон Слепцовтуун (Дона) биһиги Сордоҥнооххо алын сүһүөх кылаастан саҕалаан, Өймөкөөн орто оскуолатын бүтэриэхпитигэр диэри оҕо сааспыт бииргэ ааспыта.
Дона аҕата Баһылай Слепцов оҕотун инникитин сөпкө билгэлээн: “Миигин бу уолум иитиэҕэ, киниттэн киһи киэнэ кылааннааҕа тахсыаҕа”, — диирин Сордоҥноох олохтоохторо истибит, оҕонньор уолун наар бэйэтин кытта илдьэ сылдьарын көрбүт буолуохтаахтар. Дона ийэтин Аананы кыра эрдэхпиттэн өйдүүбүн. Кини сүрдээх холку, сэмэй майгылаах, кэрэ-номоҕон дьүһүннээх этэ. Ыстаадаттан бөһүөлэккэ табанан бурҕатан кэлэллэрин көрөн саллар аҕай этим. Табаһыттар кыһын тоһуттар тымныыга, сайын уот куйааска, бырдахха, ардах-самыыр аннынан булугас өйдөөх, хорсун буолан, айылҕа бары көстүүтүн туораан тулуйан сырыттахтара.
Спиридон Васильевич табаһыт дьиэ кэргэнигэр төрөөбүт буолан, бу хаачыстыбылары барытын иҥэринэн улааппыта. Кини кэрэни кэрэхсиир, үтүө суобастаах, үлэһит бэрдэ, ылыммыт дьыалатын тиһэҕэр тиэрдэр эрэллээх кэргэн, аламаҕай аҕа, эһэ, дьиэ кэргэнин кытаанах дурдата-хаххата, дьиэтигэр-уотугар бүгүрү, сайаҕас, тутаах киһи этэ. С.В. Слепцов курдук киһи биһиэхэ тарбахха баттанар ахсааннаах дии саныыбын.
Мин – сибээс эйгэтигэр 36 сыл үлэлээбитим. Онтон Спиридон Васильевич оскуола дириэктэринэн, нэһилиэк дьаһалтатын баһылыгынан хайдахтаах курдук ыарахаттары туораан үлэлээбитин-хамсаабытын Томтор олохтоохторо өйдүүр буолуохтаахтар.
Өймөкөөн орто оскуолатыгар үөрэнэр сылларбытыгар Сордоҥноох оҕолоругар Дона улахан аптарытыат этэ. Кини барыбытын көмүскүү, харайа сылдьара диэтэхпинэ да мэлдьэҕэ суох дии саныыбын.
Мария Поликарповна кинигэтигэр бииргэ үөрэммит үөлээннээҕим Поликарп Бояров: “Кини – дьоллоох киһи” диэн ахтыытын түмүктүүрүгэр “… бу маннык олорон ааспыт киһи үтүөтэ (добрые дела) Улуу Таҥара иитинэн оҕолоругар, сиэннэригэр толору дьоллоох олоххо суолу аһан хаалларар, ол иһин Таҥара кинилэри куруутун көмүскүү-харыстыы сылдьыаҕа”, — диэн үтүө тылынан ахтыбыт этэ.
Оттон бэтэрээн-учуутал С.Т. Неустроева “Дьон-сэргэ туһугар үлэлээбитэ” диэн суруйуутугар: “олох уһуннук олорбуккунан сыаналаммат, олох тугу оҥорбуккунан, ол – дьон өйүгэр-санаатыгар төһө иҥмитинэн сыаналанар” диэн бэргэнник даҕаны бэлиэтээбит.
Бу туһунан сиһилии “Хотугу сардаҥа” хаһыакка ааҕыҥ.
Раиса Винокурова, сибээс бэтэрээнэ, Томтор