Егор Владимирович кэриэһигэр анаммыт 3-с улуустааҕы хапсаҕай күрэһэ үрдүк таһымнаахтык буолан ааста.
Тэрээһиҥҥэ 10-тан тахса нэһилиэктэн 132 спортсмен оҕо кэлэн, 12 ыйааһыҥҥа күөн көрүстэ.
Күрэхтэһиигэ 1-кы, 2-с, 3-с миэстэлэргэ грамота, мэтээл уонна харчынан бириэмийэ туттардылар.
Мындааба оскуолатыттан, Гоша Майаҕас оскуолатыгар үлэлээбит кэлэктиибэ, Оҕо-спортивнай оскуолата — 3, кийиитим Наталья Васильевна бииргэ үөрэммит үөлээннээхтэрэ эмиэ үс, уолум Алексей Чачуа бииргэ үлэлиир табаарыстара — Өймөкөөн улууһун таксистарын сулууспата, урбаанньыт Инна Ефимова икки уонна Борис Егоров бириистэри туруордулар.
Өймөкөөн улууһун Төрүт нэһилиэгиттэн 14 саастаах 8-с кылаас үөрэнээччитэ Миша Егоров күрэхтэһиигэ кэлэн кыттан, 2-с бириистээх миэстэҕэ тигистэ. Кинини ыраах Өймөкөөнтөн уолум Алексей Владимирович массыынатынан аҕалан, аһын-таҥаһын, хонор сирин дьаһайан, күрэхтэһиигэ арыаллыы, сүбэлии-амалыы сырытта.
Оҕом Гоша барахсан үтүө санаалааҕа, киһи быһыытынан көнөтө бу да тэрээһиҥҥэ биллэн ааста. Күрэх уурбут-туппут курдук сатанан, табыллан истэ.
Бу күрэхтэһии ыытылларыгар сүрүн күүһүнэн кийиитим Наталья Васильевна буолла. Дьокуускайга олорор кыыһым Саргылаана, кийиитим Юлия сүбэлэрэ-амалара эмиэ күүс-көмө буолла.
Гоша ийэ кынна Матрена Иннокентьевна Артамонова биһигини дьиэтигэр үөрэ-көтө көрсөн, аһатан-сиэтэн, бырааһынньыктааҕы остуол тэрийдэ. Маанылаах сандалыта биһиги кэллэхпит аайы толорутунан сөхтөрдө.
Маны тэҥэ сүүрүүгэ-көтүүгэ, туох эмэ суһаллык наада буоллаҕына түргэн туттуулаах, сыыдам сырыылаах сиэннэрим Максимка уонна Амелия эттэххэ барытын улгумнук толорон истилэр.
Бииргэ төрөөбүт быраатым уола Борис Егоров күрэхтэһии бары түгэнин хаартыскаҕа түһэрэн, видеоҕа устан үйэтитэргэ үлэлэстэ.
Найахы нэһилиэгин тустууга тириэньэрэ Айсен Копырин күрэхтэһии саҕаланыаҕыттан бүтүөр диэри доргуччу, күүстээх куолаһынан комментатордаан, күрэһи иилээн-саҕалаан ыытта.
Күрэхтэһэ сылдьар оҕолору, тириэньэрдэри тотоойу, минньигэс аһынан хааччыйбыт Мындаабатааҕы интернат остолобуойун бары үлэһиттэригэр, бу тэрээһиҥҥэ бары ис сүрэхтэриттэн көмөлөспүт, тэҥҥэ сүүрбүт-көппүт, биир өйүнэн-санаанан сылдьыбыт тэрийээччилэргэ, тириэньэрдэргэ, судьуйаларга, спортсменнарга, анал бириистэри туруорбут үтүө санаалаах дьоҥҥо, чугас дьоммутугар, аймахтарбытыгар, оҕом Гоша Төрүккэ бииргэ улааппыт, үөрэммит, Мындааба спортивнай оскуолатын бииргэ бүтэрбит табаарыстарыгар сүһүөхтээх бэйэм сүгүрүйэн, хоолдьуктаах бэйэм хонкуйан туран барҕа махталбын тиэрдэбин.
Оҕом иккис дойду оҥостубут Уус Алдан улууһун элбэх үтүө санаалаах дьоно, бырааттара, доҕотторо кинини өйдүү-саныы сылдьаллара, мин уолбунан киэн тутталлара саныахха олус үчүгэй. Куруутун бары маннык бииргэ эйэ-дэмнээхтик, үөрэ-көтө сылдьыҥ, чэгиэн-чэбдик туруктаныҥ, эйэни, тус олоххутугар дьолу-соргуну баҕарабын.
Бу туһунан сиһилии “Хотугу сардаҥа” хаһыакка ааҕыҥ.
Махталы кытта Егор Владимирович ийэтэ Светлана Чачуа, Дьокуускай