1960 сылтан саҕалаан 1994 с. ыһыллыар диэри “Өймөкөөн” сопхуос дириэктэрдэринэн дьоҥҥо-сэргэҕэ дириҥник ытыктанар, үлэһит бэрдэ эр бэртэрэ үлэлээбиттэрэ.
“Өймөкөөн” сопхуос бастакы дириэктэрэ Мярин Николай Николаевич 1960-1962 сс. Таһаарыылахтык үлэлээбитэ. Кини 1929 с. ыам ыйын 29 күнүгэр Өймөкөөн оройуонугар төрөөбүтэ.
1948 с. Дьокуускайдааҕы финансовай-кредитнэй техникумҥа үөрэнэ киирбитэ. Онтон Ленинградка финансовай-экэнэмиичэскэй институкка үөрэммитэ. Ол кэнниттэн Саха АССР Үп министиэристибэтигэр үлэлээбитэ.
1960 с. Дьокуускайдааҕы ССКП Обкома Н.Н. Мярины “Өймөкөөн” сопхуос дириэктэринэн анаабыта. Ол дьыл Өймөкөөн, Томтор, Сордоҥноох уонна Үчүгэй нэһилиэктэригэр түөрт отделениелаах “Өймөкөөн” сопхуос тэриллибитэ.
Н.Н. Мярин үлэлиир кэмигэр сопхуос тыа хаһаайыстыбатын бородууксуйатын оҥорон таһаарыыга судаарыстыба сорудаҕын чиэстээхтик толороро, сүөһү ахсаана элбиирин ситиспитэ. Оччолорго оройуоҥҥа ынах сүөһү ахсаана – 5002, сылгы – 2760, таба – 15107, саһыл – 300 этэ. Н.Н. Мярин Томтор нэһилиэгэр социальнай эбийиэктэр тутууларыгар үбүлээһини ситиспитэ.
Н.Н. Мярин “Бочуот знага” уордьан кавалера, үлэ бэтэрээнэ, элбэх үбүлүөйдээх мэтээллэринэн наҕараадаламмыта. Кини аата СӨ Үп уонна ИДь министиэристибэлэрин Бочуоттаах Кинигэлэригэр киирбитэ.
Максимов Анатолий Михайлович 1988-1994 сс. сопхуос дириэктэринэн үлэлээбитэ. Кини 1950 с. олунньу 23 күнүгэр Уус-Алдан улууһун Дүпсүн нэһилиэгэр төрөөбүтэ. 1976 с. СГУ тыа хаһаайыстыбатын факультетын бүтэрэн, зоотехник буолбута.
А.М. Максимов 1977 с. Муома улууһун “Искра” сопхуоһугар кылаабынай зоотехнигынан, дириэктэри солбуйааччынан, Уус-Алдаҥҥа “Дүпсүн” сопхуоска дириэктэрдээбитэ. 1984 с. Өлөөн улууһугар көһөн райисполком бэрэссэдээтэлинэн, тыа хаһаайыстыбатын управлениетын начаалынньыгынан үлэлээбитэ. 1988 с. “Север” холбоһукка тэрийээччи-исписэлиис этэ. Ол кэнниттэн “Өймөкөөн” сопхуос дириэктэринэн анаммыта. А.М. Максимов үлэлиир кэмигэр сопхуоска ынах сүөһү ахсаана – 4667, сылгы – 4044, таба — 18316, саһыл – 1118, хорек – 50 этэ.
Кини саҕана Тымныы Полюһугар элбэх олорор дьиэ, социальнай уонна производственнай эбийиэктэр, Култуура дьиэтэ, Өймөкөөн сэлиэнньэтигэр спортсаала, электростанция, гаражтар о.д.а. тутуллубуттара.
А.М. Максимов уларыта тутуу уустук сылларыгар сопхуоһу сатабыллаахтык салайбыта биллэр.
Араас сылларга “Өймөкөөн” сопхуос дириэктэрдэринэн үлэлээбиттэр тустарынан сиһилии “Хотугу сардаҥа” хаһыакка ааҕыҥ.
Надежда Литвинцева хомуйан оҥордо, Томтор