Мин “Өймөкөөн” сопхуоска молоканкаҕа үлэлии сырыттахпына сэбиэдиссэй Евдокия Яковлевна Туласынова, сопхуос идэлээх сойууһуттан направление ылан, миигин уонна Анна Григорьевна Сивцеваны Иваново куоракка буҕаалтыр үөрэҕэр ыыппыта.
Онон биһиги 1977 с. балаҕан ыйын 1 күнүттэн 1978 с. бэс ыйын 8 күнүгэр тыа хаһаайыстыбатын буҕаалтырдарын бэлэмниир комбинакка үөрэммиппит. Үөрэхпин бүтэрэн баран мин “Өймөкөөн” сопхуос гараһыгар суотчутунан үлэлии киирбитим.
Онтон 1995 с. механизация буҕаалтырынан көһөрбүттэрэ. Мин 2000 с. онуоха эбии гаражка диспетчеринэн, кассирынан сылдьыбытым. 2003 с. икки сыл кылаабынай буҕаалтыры солбуйбутум.
2005 с. механизация буҕаалтырынан уонна кассирынан үлэлиирбэр сарбыйыыга түбэспитим эрээри, ол сыл үлэбэр төттөрү ыҥыран ылбыттара уонна буҕаалтыр-кассирынан анаабыттара.
Бу үлэбиттэн бэс ыйыгар бэйэм уурайбытым уонна “Өймөкөөн” РЭС тэрилтэтигэр инженеринэн үлэлии киирбитим. Манна 12,5 сыл устата таһаарыылаахтык үлэлээбитим.
Сопхуоска үлэлиирим саҕана кэбиниэтим гаражка сыста турар буолан, массыыналар газтара киирэрэ. Күн аҥаара ону тулуйан үлэлээн баран, бухгалтерияҕа барар этим. Оччолорго сопхуоска 40-н тахса араас массыына баара.
Биһиги суоппардары, тырахтарыыстары, өрөмүөннүүр мастарыскыай үлэһиттэрин кытта эйэ-дэмнээхтик үлэлиир этибит. Ол саҕана сопхуоска суоппардар, тырахтарыыстар М.П. Попов, П.П. Громов, Ю.А. Андреев, Ю.М. Мельников, Ю.А. Тихомиров о.д.а. үтүө суобастаахтык үлэлээбиттэрэ. Харабыллар В. Кравец Валерий, Н.. Попов, И. Попов эбээһинэстэрин кыһаллан туран толороллоро.
Биһиги бары үлэ үтүмэнин үлэлээн, олус иллээх кэлэктиип этибит. Араас субуотунньуктарга көхтөөхтүк кыттарбыт: саас оттук мас бэлэмнээһинигэр, сайын от кэмигэр кэбиһиигэ көмөлөһөрбүт. Сороҕор “Тонорго” 2-3 хонукка баран оттоон кэлэрбит. Кыһын, күһүн хотоҥҥо ыанньыксыттары солбуйарбыт, кыстыкка киириигэ хотоннорун сыбаһарбыт.
Итинник үлэ-хамнас элбэх этэ. Ол быыһыгар биһиги нэһилиэк култуурунай олоҕор тэрилтэнэн кыттарбыт, нэһилиэктэринэн сылдьан кэнсиэр көрдөрөрбүт, гастроллуурбут.
Бу барыта — олоҕум умнуллубат күндү кэмнэрэ.
Бу туһунан сиһилии “Хотугу сардаҥа” хаһыакка ааҕыҥ.
Анна Михайловна Попова, биэнсийэлээх, Дьокуускай