Бу күннэргэ Таатта улууһунан ааһар «Халыма» федеральнай суол Р-504 учаастагын хаста да саба сырыттылар.
«Ол хас да төрүөттээх: бастакынан, ыарахан уйуктаах массыына сырыыта элбээбитэ, таһаҕаһы таһыы хас да төгүл улаатыыта, көҥүллэммит нормативнай-ноҕуруускаҕа сөп түбэспэккэ, аһара барыыта. Иккис төрүөтэ — сир ириитэ. Ол эбэтэр сири-уоту тупсарар соруктаах мелиоративнай үлэни ыытыы. Онно эбии тохтоло суох хас да күнү быһа сөҥүү түһүүтүн сабыдыала. Үсүһүнэн, тоҥ сир ирэн, суолу алдьаныыга тиэрдиитэ.
Бу түмүгэр «Халыма» федеральнай айан суолун 177-315 км учаастагын суола улаханнык алдьанна.
Билигин таһаҕаһы ыарахан уйуктаах ыйааһыннаах массыыналар тиэйэллэр. РФ Бырабыыталыстыбатын 2020 с. ахсынньы 21 күнүнээҕи 2200 №- дээх «Таһаҕаһы тиэйиигэ массыынанан таһыы быраабылаларын бигэргэтии туһунан» уурааҕар олоҕуран, таһаҕаһы тиэйэр массыына ыйааһына 32 туоннаттан ордуо суохтаах.
Билигин бу суолунан сууккаҕа 1478 айан массыыната ааһар. 2022 сылтан 2024 сылга диэри толору таһаҕаһы тиэммит аҥардас айан массыынатын ахсаана 55% элбээтэ. Онон билиҥҥи туругунан «Халыма» федеральнай айан суолугар туруоруллубут ПУИД (автоматический пункт учёта интенсивности движения) биэрэр чахчытынан, бу суолунан күн аайы сууккаҕа 185 ыарахан таһаҕаһы таһар массыына ааһар», — диэн бэлиэтиир «Бүлүү» Упрдор ФКУ айан суолун көрөр-истэр отделын салайааччыта Александр Давыдов.
«Бүлүү» Упрдор ФКУ массыына суолун учаастактарын сөптөөх ирдэбилгэ олоҕуран, анал нормативнай-техническэй турукка тиэрдэр туһуттан тустаах бырагыраамаларынан өрөмүөнү өрүү былааннаахтык ыытар.
Ол курдук, 2024 сыл бэс ыйыгар 197-216 км суол учаастагын хапытаалынай өрөмүөнүн ыытыыга судаарыстыбаннай хантыраах түһэрсиллибитэ. Бу үлэ 2026 сылга түмүктэниэҕэ.
Билигин Чурапчыттан Ытык Күөлгэ диэри массыына суолун хапытаалынай өрөмүөнүгэр уонна бырайыактыыр-чинчийэр үлэлэри ыытыыга докумуон оҥоһулунна.
Ити курдук, «Халыма» айан суолун учаастактарын хапытаалынай өрөмүөнүн уонна саҥардыы үлэлэрэ 2025 сылтан саҕаланаллара былааннанар.
Онон бу күннэргэ массыына суолун саҥардыы олохтоохтук ыытыллыан иннинэ бу учаастакка харгыһа суох сырыыны хааччыйыыга туһуламмыт өрөмүөнү суолу көрүү-истии үп эрэ суотугар оҥоһуллар.
«Бүлүү» Упрдор ФКУ салалтата айанньыттартан, суоппардартан үөскээбит уустук быһыыны-майгыны учуоттуургутугар көрдөһөр уонна курууһу таһыы быраабылатыгар олоҕуран, ыйыллыбыт нуорманы тутуһарга ыҥырар.
Елена Потоцкая