Арассыыйаҕа Дьиэ кэргэн уонна Саха сиригэр Оҕо саас сылларыгар Өймөкөөн улууһун киинигэр Уус-Ньараҕа бастакынан уол оҕо күн сирин көрдө. Кинини дьоно Максим диэн ааттаатылар.
Саҥа төрөөбүт уолчаан эдэр ийэтэ — Анастасия Козырнова уонна эбэтэ Алена Полищук. Кинилэри бу кэрэ-бэлиэ түгэнинэн Өймөкөөн оройуонун баһылыгын э.т. Иван Максимов, баһылыгы социальнай боппуруостарга солбуйааччы Саргылаана Можукова уонна нэһилиэнньэ көмүскэллээх буолуутун Управлениетын салайааччыта Прасковья Аммосова улуус киин балыыһатыгар тиийэн эҕэрдэлээтилэр.
Бу үөрүүлээх күҥҥэ «Үйэ оҕотугар» анаммыт сертификаты бэлэх туттардылар. 2024 сылга ийэ хапытаалын кээмэйэ индексацияланан 110 775 тыһ солк. тэҥнэһэр, оттон иккис оҕоҕо республикатааҕы ийэ хапытаалын суумата – 232 688, 47 солкуобай. Итини тэҥэ улуус дьаһалтатын уонна дьокутааттар Сэбиэттэрин ааттарыттан Дьиэ кэргэн уонна Оҕо сылыгар туһуламмыт 30 тыһ. кээмэйдээх харчынан сертификаты бу кэрэ-бэлиэ түгэҥҥэ туттардылар.
Кыһыл оҕо, кыракый Максим эбэтэ Алена Полищук кинилэр Дьиэ кэргэннэригэр бу хатыламмат үөрүүлээх түгэн диэн бэлиэтээтэ уонна уолчаан хос эбэтин уонна ийэтин дойдуларыгар, Өймөкөөн сиригэр күнү көрөн, бу ыалга Тымныы полюһун үһүс көлүөнэ ыччата буоларын астынан кэпсээтэ.
Санатар буоллахха, быйыл Саха сиригэр, Дьокуускайга бастакынан уол оҕо төрөөбүтэ. Тохсунньу 1 күнүгэр 01.16 чааска Михаил уонна Ирина Михайловтар дьиэ кэргэттэригэр төрөөбут оҕоҕо төрөппүттэрэ Одунхан диэн ааты биэрбиттэрэ.
Ол туһунан бастакынан бэйэтин телеграм-ханаалыгар регион баһылыга Айсен Николаев иһитиннэрэн турар.
Эрэдээксийэ