Өймөкөөн улууһунааҕы Тыа хаһаайыстыбатын управлениетын исписэлииһэ Евдоким Кондаков отчуттар бу дьыл атырдьах ыйын 5 күнүнээҕи туругунан төһөнү оттоон иһэллэрин туһунан иһитиннэрдэ.
Улуус үрдүнэн 3660 тонна былаантан 623,3 гектар сир охсулунна. Онтон 413 тонна кэбиһии турда. Билиҥҥитэ былаан туолуута 11,3 бырыһыаҥҥа тэҥнэстэ.
Оройуон кэтэх хаһаайыстыбалаахтара атырдьах ыйын 5 күнүнээҕи туругунан холбоон 245 тонна (12,6 %) оту туруордулар. Былааннара – 2189 тонна. Оттон бааһынай хаһаайыстыбаларын окко былааннара холбоон 1045 тоннаҕа тэҥнэһэр. Кинилэр барыта 123 тонна (11,8 %) кэбиһиилээхтэр. Тэрээһиннээх хаһаайыстыбалар бу күннээххэ былааннарын (416 тонна) 3,6 бырыһыан толорон иһэллэр.
Быйыттаах сайылык отчуттара
Томтор нэһилиэгин отчуттара
Өймөкөөн улууһун отчуттара төһө даҕаны ардах мэһэйдээтэр, кыах баарынан охсуллубут сирдэриттэн кэбиһиилэри кэчигирэтэллэр. Биирдиилээн хаһаайыстыбалар былааннаах отторун булунан, күрүөлүүр-хаһаалыыр, бүтэй тутар үлэлэрэ хаалла.
Маныаха үгүс дьон дьиэ кэргэнинэн, доҕотторунаан күргүөмнээхтик үлэлээтилэр. Холобур, сылгы иитиинэн дьарыктанар Томтор нэһилиэгин олохтоохторо Сивцевтэр (Гавриил Михайловичтаах) бу күннэргэ “Арылыас” диэн сылгыларын баазатын эҥээр баар сирдэригэр оттоон бүттүлэр.
Атырдьах ыйын бастакы дэкээдэтэ түмүктэнннэ. Хаалбыт кэмҥэ улуус отчуттара күн-дьыл туруга тубустар эрэ өссө даҕаны күүстээх үлэҕэ ылсыахтара турдаҕа.
Любовь Кривошапкина