Соторутааҕыта Биэрэк Үрдэ учаастак кулуубун тэлгэһэтигэр сандал сааһы көрсүү үөрүүлээх күнэ буолан ааста. Бу дьаһалы РФ Дьиэ кэргэн уонна СӨ Оҕо саас сылыгар анаатыбыт.
Тэрээһиҥҥэ Өймөкөөн нэһилигин олохтоохторун түөлбэнэн күрэхтэһиилэрэ бэрт сэргэхтик ыытылынна.
Быйыл халыҥнык түспүт хаары баттаһа, “Аҕа уолунаан” диэн сүүрүүлээх-көтүүлээх күрэхтэһии олус көхтөөхтүк ааста. Күрэҕи олохтоох дьаһалта үлэһитэ Степан Готовцев иилээн-саҕалаан ыытта.
Күрэхтэһии түһүмэхтэрэ бэйэни билиһиннэрииттэн саҕаланнылар. Салҕыы эҕэрдэ, кулуһун уматыы, тоһоҕо саайыыта, хаарынан сыал быраҕыы, тоҥуу хаар устун сатыы уонна хайыһардаах сүүрүү, салааскаҕа хайыһары ууран баран уолаттар сырсыылара, оҕону салааскаҕа соһон сүүрүү тыҥааһыннаахтык, көрдөөхтүк аастылар.
Тымныы полюһугар сандал сааһы көрсөр бэлиэ күммүт итинник олус кэрэхсэбиллээхтик ааста.
Сиһилии “Хотугу сардаҥа” хаһыакка ааҕаарыҥ.
Татьяна Итегелова, кулууп салайааччыта, биһиги общ.корр.