Суруналыыс, кыраайы үөрэтээччи С.М. Егоров аатынан Төрүт нэһилиэгинээҕи бибилэтиэкэҕэ оҕо-аймах сөбүлээн сылдьар.
Каникул күннэргэ манна араас тэрээһин ыытыллыбытын туһунан бибилэтиэкэр Нина Чачуа сэһэргээтэ.
Ол курдук, сынньалаҥ күннэри бибилэтиэкэҕэ атаарыы чэрчитинэн манна таайтарыылаах күн – таабырыннары таайыы, викторинаҕа кыттыы күнэ ыытылынна. Оттон иһитиннэрии күнүгэр оҕолор “Книжкины именины-2024” диэн бэрт сэргэх күнү атаардылар. Ааҕыы күнүгэр “Читалинка” тэрээһин буолла. Энциклопедия күнэ, сэрэйиллэрин курдук, элбэҕи билиэн-көрүөн баҕалаахтарга ананна, маны сэргэ ааҕары сөбүлүүр оҕолор остуол оонньууларыгар дуоһуйа оонньоотулар.
Манна даҕатан эттэххэ, быйыл үгүс улахан дьон, оҕолор сөбүлүүр остуоруйаларын үбүлүөйдэрэ бэлиэтэнэр эбит. Холобур, Ю. Олеша “Три Толстяка”, К. Чуковскай “Муха Цокотуха” остуоруйаларын 100 сыла, Х. Андерсен “Снежная королева” остуоруйата суруллубута 180 сыла бэлиэтэнэр.
Ити курдук Нина Григорьевна салалтатынан Төрүт оҕолоро каникулларын туһалаахтык атаараллара кэрэхсэбиллээх.
Любовь Кривошапкина