Биэрэк Үрдүгэр – үбүлүөйдээх ыһыахха

Быйыл Биэрэк Үрдэ учаастага төрүттэммитэ 80 сыллаах өрөгөйдөөх үбүлүөйэ бэлиэтэнэр. Ыһыахха алгысчыт (Н.Н. Старков) кынаттарын — тоҕус туруйа уолу, сэттэ кыталык кыыһы батыһыннаран киирэн, Аал уот иччититтэн көрдөстө, көҥүл ылан, өрөгөйдөөх сыл сылгы  төбөлөөх бэлиэ сэргэтин ыраас халлаан диэки өрө астаран, туруортаран кэбистэ. 

Ыраахтан-чугастан бу кыракый учаастактан үүнэн тахсыбыт уруу-хаан аймахтар, убай-быраат, аҕыс-балыс дьон оҕолорун-сиэннэрин кытта күндү ыалдьытынан буоллулар. Элбэх киһи мустан, үҥкүү-битии дьиэрэйдэ, ырыа-тойук чоргуйда, оһуокай дуорайда.

Бырааһынньыкка Өймөкөөн нэһилиэгин сулустара, уус-уран самодеятельность артыыстара кыттан, оскуола кэлэктиибэ хомуска дьүрүһүтэн, дьонноругар-сэргэлэригэр бэртээхэй кэнсиэри бэлэх ууннулар. Кэнсиэри ылбаҕай тыллаах ырыаһыппыт  Иван Старков иилээн-саҕалаан ыытта.

Успуорду сэҥээрээччилэр мас тардыһан, хары баттаһан, хапсаҕайдаһан хачыгырастылар, сүүрүүгэ күрэстэстилэр. Манна кэрэ аҥаардар эмиэ эр бэртэриттэн хаалсыбатылар, тэбис-тэҥҥэ түһүстүлэр.

Саха аһын арааһа ыһыах сандалытыгар тэлгэннэ, кыынньар кымыс сыыгыначчы үлүннэ. Хорчуоппа үлэлээн, үөлүллүбүт эт ураты сыта дыргыйда.

Быйылгы Дьиэ кэргэн уонна Оҕо саас сылларынан саха таҥаһын күрэҕэр дьиэ кэргэттэр, оҕолор актыыбынайдык кытыннылар. Уран тарбахтаахтар сахалыы оҥоһуктарынан быыстапка тэлгэннэ. Ону тэҥэ ХХ үйэ быыстапката бибилэтиэкэҕэ тэрилиннэ. Ыһыахха Дьокуускайтан, атын улуустартан биир дойдулаахтарбыт ыалдьыттаатылар, олохтоох ытык дьоммут кытыннылар. Өймөкөөн, Томтор нэһилиэктэриттэн, Биэрэк Үрдүттэн тэрилтэлэр бириис туруоран уонна харчынан көмө оҥорон, күрэхтэһиилэр кыайыылаахтарыгар туттардыбыт.

Ити курдук олохтоохтор бары ылсан түмсэн, кэрэхсэбиллээх бырааһынньыгы тэрийдилэр.

Бу туһунан сиһилии “Хотугу сардаҥа” ааҕыҥ.

Татьяна Итегелова, биһиги общ.корр., Биэрэк Үрдэ

 

Читайте дальше