Дьокуускайга, Үс хатыҥҥа, Туймаада Ыһыаҕын чэрчитинэн улуустар, тэрилтэлэр түһүлгэлэрэ тэлгэннэ. Уйгулаах диэн 65 №-дээх түһүлгэҕэ Өймөкөөн дьоно тоҕуоруһа мустан, быйаҥнаах ыһыаҕы ыстылар. Үөрүүлээх күн алгыс сиэриттэн-туомуттан саҕаланан, үгүс ыалдьыт дууһатын аһар кэрэ көстүүлэр элбэҕи кэпсээтилэр.
Туймаада ыһыаҕар «Маанылаах түһүлгэ» диэн улуустар түмсүүлэрин күрэҕэ сыллата ыытыллар. Быйылгы күрэххэ Томпо, Хаҥалас, Өлүөхүмэ, Амма, Ньурба, Өймөкөөн, Орто Халыма, Анаабыр, Бүлүү, Өлөөн, Ленскэй, Үөһээ Дьааҥы, Чурапчы улуустара кытыннылар.
Күрэх ирдэбилинэн түһүлгэни киэргэтии, өбүгэ үгэһин тутуһуу, сахалыы таҥас-сап, ас-үөл көрдөрүүтэ, биир дойдулаахтары түмүү, ону таһынан өрөспүүбүлүкэҕэ — Култуура, Арассыыйаҕа норуоттар сомоҕолоһууларын сылларынан бу сүрүн тиэмэни арыйан көрдөрүү буолла. Манна Өймөкөөн улууһун түһүлгэтэ “Кэскиллээх түһүлгэ” анал аатынан, Махтал суругунан уонна 10 тыһ. солк. сэртипикээтинэн бэлиэтэннэ.
Ити ситиһиибит Өймөкөөн түһүлгэтигэр Ыһыаҕы ыһыыга көхтөөхтүк кыттыбыт үлэбит түмүгэ буолар.
Биир дойдулаахтар спортивнай күрэхтэргэ актыыбынайдык кытыннылар. Ол түмүгүттэн билиһиннэрдэххэ маннык.
Кыргыттар ыстанан ким сымсатын көрдөрдүлэр: 1-кы миэстэни Айыына Плотникова ылла, 2-с Наталья Петрова буолла, 3-с миэстэҕэ Саргылаана Гоголева тигистэ.
Хапсаҕайга Өймөкөөнтөн төрүттээх ыччат дьоммут Максим Слепцов, Слава Саввинов, Саша Винокуров, Федор Сивцев, Ярослав Габышев, Станислав Иванов кыттан илин-кэлин түһүстүлэр. Тыҥааһыннаах киирсии түмүгэр 1-кы миэстэни Александр Винокуров ылан, 10 тыһ. суумалаах сэртипикээтинэн наҕараадаланна, 2-с миэстэ Федор Сивцев (5 тыһ. солк.),
3-с миэстэ Станислав Иванов (2 тыһ. солк.) буоллулар.
Өймөкөөн түһүлгэтигэр успуорт көрүҥнэригэр күрэхтэспит кыттааччылар олус астыннылар. Өймөкөөн улууһун дьаһалтата кинилэргэ “IRON” фирма сэртипикээттэрин бириис быһыытынан туттарда.
Түһүлгэҕэ турбут саҥа саха балаҕанын тутуутун Саха сирин тимир суоллара тэрилтэ салайааччытын солб. Алексей Местников спонсордаата, киниэхэ дириҥ махталбытын тиэрдэбит. Балаҕаммыт Ыһыах күн түһүлгэбитин киэргэттэ, мустубут дьон махталын ылла. Тутууга күннэри-түүннэри үлэлээбит дьоммутугар — Евгения Габышева, Алексей Винокуров дьиэ кэргэннэригэр махтанабыт.
Балаҕан тутуутугар биир дойдулаахтарбыт – Өймөкөөнтөн төрүттээх Анна Яробейкина, Валерия Яробейкина, Александр Готовцев, Рустам Кривошапкин, Авдотья уонна Виталий Кондаковтар харчынан көмөлөстүлэр.
Бырааһынньыкпытыгар Ил Түмэн депутата Гаврил Алексеев улахан сыаналаах бирииһи – электрогенераторы – туруорда.
Ыһыах күн Өймөкөөн түһүлгэтигэр кэлэн ыалдьыттаабыт, тэрээһиннэргэ кыттыбыт дьоммутугар барыларыгар улахан махталбытын тиэрдэбит.
Куоракка олорор өймөкөөттөргө эмиэ махтал-баһыыба тылларын этэбит, кинилэр землячествоҕа өрүү күүс-көмө, тирэх буолаллар. Бар дьоммут, бары доруобай буолуҥ, эһигини өрүү ситиһии арыаллаатын!
Анна АТАСТЫРОВА,
Өймөкөөн улууһун түмсүүтүн салайааччыта,
Дьокуускай