Самаан сайыммытын уруйдуу, Өймөкөөн оройуонун ыһыахтара этэҥҥэ аастылар.
Улууспут биир тутаах нэһилиэгэр, Төрүт сиригэр-уотугар бэтэрээннэр олус бэркэ айаммыт суола-ииһэ арыллан ыһыахтаан, алгыс маанытын иҥэринэн кэллибит.
Иннокентий Посельскай, Прокопий Антонов суоппардаан, өйдөбүнньүк күлүм түгэннэрин түһэрэн, сиэри-туому тутуһан алаадьылаах саламаатынан айах тутан арыалланан истибит.
Төрүккэ тиийбиппитигэр хоточчу тардыллыбыт толору астаах сандалы остуол, сынньанар сирбит барыта бэлэм кэтэһэн турар эбит.
Сарсыардаттан түһүлгэҕэ сиэдэрэй көстүүлээх сэргэ туруоруутун үөрүүлээх түгэнигэр кыттыыны ыллыбыт. Бу сэргэ улахан суолталаах, кэлбит кэм кэрэһитэ буолан туруоҕа. Улууспутугар култуура уонна үтүө үгэстэр сылларын чэрчитинэн бэйиэт П.Я. Тулааһынап 110 сааһа уонна Төрүт дьонун сэргэтин кэрэ эйгэҕэ уһуйар кулууптара 70 сылынан добун ыһыаҕа ыһылынна.
Нэһилиэк дьонун сомоҕо күүһүнэн, биир санаанан тэриллибит, айылҕа муҥутуур күүһүн ылынан төгүрүччү күөх солкоҕо сууламмыт тыанан күрүөлэммит, көбүс-көнө хонуулаах сабыс-саҥа түһүлгэни тутан дьэндэппиттэр.
“Мин ырыам олоҕу хоһуйар” диэн ааттаах П.Я. Тулааһынап айымньыларынан испиктээк ыһыаҕы арыйда. Кэнсиэр, куонкурустар, төрүт оонньууларга спортивнай күрэхтэр утуу-субуу ыытылла турдулар.
Кэлбит ыалдьыттары түмэн баай астаах сахалыы, субуруччу тардыллыбыт сандалы остуолларга бырааһынньыктааҕы аһынан күндүлээтилэр. Ыалдьыттар истиҥник кэпсэтэн-сэһэргэһэн, махтал тылларын эттилэр.
Өймөкөөн оройуонун баһылыга Александр Оконешников уйгу-быйаҥ ыһыаҕынан эҕэрдэ тылын бар дьонугар анаата. Эдэр салайааччы, Төрүт нэһилиэгин баһылыга Алексей Кондаков эмиэ эҕэрдэтинэн кыттыста.
Кыра нэһилиэк да буоллар, сүрдээх кэпсэтинньэҥ, сайаҕас, аламаҕай дьонноох эбит. Сүүрэ-көтө сылдьар актыбыыстар бырааһынньыгы бэркэ түмсүүлээхтик тэрийсибиттэр.
Халлааммыт бэрт быстах кэмҥэ ардаан, сирин-уотун быйаҥсытан ааста.
Оҕо уһуйааныгар олус бэртээхэй түмэли тэрийбиттэрин сыныйан, сэргээн көрдүбүт. Барытын олус чөкөтүк, уурбут-туппут курдук оҥорбуттар. Төрүт нэһилиэгин оҕо уһуйаанын салайааччытыгар уонна бары үлэһиттэригэр ийэлии, эбэлии истиҥ махталбытын тиэрдэбит.
Дария ТИХОМИРОВА,
Томтор
Бу туһунан сиһилии «Хотугу сардаҥа» хаһыакка ааҕыҥ.