Соторутааҕыта олоҕун орто омурҕанын бэлиэтиир хомоҕой хоһоонноох, ыллам ырыалаах Евдокия Готовцева-Күндээрэ үбүлүөйдээх дьоро киэһэтэ Томтор култууратын дьиэтигэр чаҕылхайдык буолан ааста. “Хоһоон хонуулардаах, ырыа ыллыктардаах” диэн ааттаах айар куттаах Далбар хотун дьоллоох түгэнэ олохтоох дьон кэрэхсэбилин ылла.
Бу олоххо биирдэ кэлэр кэрэ-бэлиэ киэһэни Айар Старков уонна Ньургустаана Дьячкова хоһооҥҥо холбоон, ырыанан силбээн иилээн-саҕалаан ыытан, култуура дьиэтигэр ураты истиҥ эйгэни тэрийдилэр. Ытыс тыаһа, үөрүүлээх ыһыы-хаһыы биир кэм ньиргийэн, ырыа алыптаах дорҕооно мустубут дьон сүргэлэрин көтөхтө.
Бу ырыа-хоһоон түһүлгэтигэр Саха сиригэр тиийэ биллибит-көстүбүт дьоммут ыалдьыт буолан кэлэн, сахалыы алыптаах ырыаларын бэлэхтээтилэр. Олор истэригэр Семен Сивцев, Дмитрий Винокуров, Любомир Кондаков, Спартак Аммосов, Татьяна Запивалова, Петр Слепцов, ону таһынан “Туйаарыма” уонна “Сардаҥа” ырыа бөлөхтөрө, “Һэй дуо” этно-бөлөх мустубут дьон кутун туттулар.
Бу дьоро киэһэҕэ итини сэргэ Евдокия Готовцева-Күндээрэ бэйэтэ олоххо көрүүтүн, иэйиитин хоһуйбут хоһоонноро хотоҕолуу кутуллан ааҕылыннылар. Хас биирдии хоһооҥҥо кини олоҕун суола, санаата, таптала, айылҕаҕа сүгүрүйүүтэ арылхайдык көһүннэ.
Томтордооҕу култуура дьиэтин дириэктэрэ Татьяна Бурцева кэллиэгэтин Евдокия Готовцева туһунан ис сүрэхтэн тахсар тылларынан истиҥник махтанарын тиэртэ. Евдокия Афанасьевна 2018 сылтан ыла бу кулууп дьиэҕэ үлэлии кэлиэҕиттэн ыла дьону түмэ тардан, үлэтигэр кыһамньылаахтык сыһыаннаһан, сахалыы куттаах, айыылартан айдарыллыбыт талаанын күн бүгүнүгэр диэри киэҥник тарҕата сылдьарын бэлиэтээтэ.
Ол курдук, Е.А. Готовцева “Куйаар дьүрүскэнэ”, “Дуораан” фольклорнай ансаамбыл, “Һэй дуо” этно-бөлөх, “Кылыһах” бөлөх, олоҥхону толорор түмсүүнү, хомус, кырыымпа тыыннаах доҕуһуолугар оонньуур кыратыттан улахан дьонугар тиийэ айар бөлөхтөрү таһаарыылаахтык салайар.
Евдокия Готовцева — СӨ култууратын туйгуна, Н.М. Заболоцкай-Чысхаан аатынан улуустааҕы литературнай бириэмийэ лауреата.
Бу дьоро киэһэҕэ оройуоннааҕы Култуура управлениетын салайааччыта Аксинья Сивцева үбүлүөйүн бэлиэтиир Евдокия Готовцеваҕа истиҥ-иһирэх тыллардаах илдьит бэлиэ суругун үөрүүлээх быһыыга-майгыга туттардылар.
Кэрэ куо Евдокия Готовцева-Күндээрэ өссө да элбэх дьон махтала сүрэҕин баҕатынан салайар үлэтин кынаттыы сырыттын. Кини төрөөбүт Өймөкөөнүн сиригэр муусука алыбыгар уйдаран ситиһиилээхтик айа-тута, сайда-кэҥии, дьоҥҥо-сэргэҕэ үөрүүнү бэлэхтии сылдьарыгар баҕарыаҕыҥ.
Дария ТИХОМИРОВА,
общ. корр.,
Томтор