Өймөкөөн улууһуттан сылдьар талааннаах, чаҕылхай устудьуоннар элбэхтэр. Олортон биирдэстэринэн Иванна Павлова буолар.
Иванна Сордоҥноох нэһилиэгиттэн төрүттээх. Кини элбэх оҕолоох Павловтар дьиэ кэргэннэригэр төрөөбүт соҕотох мааны кыыстара. Аҕата Иван уонна ийэтэ Анна ааттарын холбоон кыыстарын Иванна диэн сүрэхтээбиттэр. Кыысчаан 2019 с. Сордоҥноох орто оскуолатын ситиһиилээхтик бүтэрэн баран, былааннаабыт, баҕарбыт үөрэҕэр киирбитэ.
— Мин ХИФУ-га үөрэнэ киирэрбин эрдэттэн былааннаабытым. Быйыл 6 сыллаах үөрэхпин түмүктүүбүн, онон сыыйа-баайа дипломнай үлэбин суруйа сылдьабын. Үөрэхпин бүтэрдэхпинэ эпидемиолог буолабын. Бу мин санаабар, олус наадалаах идэ. Кыра эрдэхпиттэн биологияны уонна химияны интэриэһиргиибин.
Устудьуон олоҕо олус интэриэһинэй, чаҕылхай. Мин 3-с куурустан «ZEMA» диэн уопсастыбыннай тэрилтэҕэ киирэн үлэлээбитим. Онтон икки сыл кэриҥэ «Чысхаан» диэн Өймөкөөн улууһун эдэр ыччатын түмсүүтүгэр салайааччынан үлэлээбитим. Ол кэмҥэ улууспут оҕолорун мунньан, бэйэ-бэйэбитин кытта ыкса билсэн, үөрэн-көтөн, араас тэрээһиннэргэ ситиһиилээхтик кыттыбыппыт, Өймөкөөммүтүн ааттаппыппыт, түмсүүлээхпитин көрдөрбүппүт.
Ити курдук, сылын аайы ыытыллар ZEMA КВН-ҥа, “Боотурдар оонньууларыгар”, улуустар икки ардыларынааҕы викторинаҕа, волейболга, “Чистая земля Олонхо» экологическай аахсыйаҕа, «Якутия объединяет. Молодежь наций – взгляд в будущее” эрэгийиэннэр икки ардыларынааҕы пуорумҥа кыттан турардаахпыт.
Оччолорго атын улуустар устудьуоннарын кытта ыкса билсипиппит, оскуола оҕолоругар анаан идэни сөптөөхтүк талыыга үлэни күүскэ тэрийбиппит. Ону тэҥэ аҕам саастаах дьоммутугар тимуровскай үлэ тэрийэн ыыппыппыт. Биһиги биир дьиэ кэргэн курдук үлэлээбит кэммитин билигин олус истиҥник ахтабын.
Билиҥҥи устудьуоннар олус элэккэйдэр, туохтан да толлубаттар, барытыгар ылсан иһэллэрэ кэрэхсбиллээх. Үгүс устудьуон үөрэхтэрин таһынан үлэлиир, дууһалара сытар дьарыктаахтар. Бу — бириэмэ ирдэбилэ дии саныыбын. Түгэнинэн туһанан, бары үөрэх кыһаларын устудьуоннарын бырааһынньыкпытынан эҕэрдэлиибин. Хас биирдии устудьуоҥҥа сессияларын ситиһиилээхтик туттаралларыгар уонна куруутун көхтөөх, инникигэ дьаныардаах, туохтан да толлубакка устудьуон сылларын умнуллубаттык атааралларыгар баҕарабын! — диэн кэпсэтиибитин түмүктээтэ Иванна Павлова.
Ольга Скрыбыкина