Өймөкөөн бастыҥ ыччата Баалга муһунна

Соторутааҕыта Уус-Ньараҕа эдэр ыччакка аналлаах төгүрүк остуол, ону тэҥэ Ыччат баала олус сэргэхтик ыытылынна. Онно олох бары эйгэтигэр үлэлии-хамныы, айа-тута сылдьар, уопсастыбаннай олоххо көхтөөхтүк кыттар эдэр дьону кытта көрсүһүү, чиэстээһин буолла. Бу дьоро күн эҕэрдэ кэнсиэри киэргэттэ, онно улуус эдэр талааннара кыттыыны ыллылар. Биһиги хаһыакка анаан сыл бастыҥнарын санааларын үллэстэллэригэр көрдөстүбүт. 

Варвара Дьяконова, Төрүт орто оскуолатын учуутала:

— Мин ыччат баалыгар улуустааҕы Үөрэх управлениетын начаалынньыга Дина Фасхутдиноваттан Махтал суругу кытта 10000 тыһ. суумалаах сэртипикээти тутан олус үөрдүм. «Сыл наставнига» номинация – бу соҕотох мин ситиһиим буолбатах, үөрэппит, үөрэтэр оҕолорум уонна кинилэр төрөппүттэрин бииргэ үлэлээбиппит түмүгэ буолар. Итини тэҥэ миэхэ куруутун сүбэ-ама буолар кэллиэгэлэрим, бииргэ үлэлиир доҕотторум уонна Төрүт нэһилиэгин олохтоохторун эмиэ ситиһиилэрэ. Оскуолам кэлэктиибигэр баҕарыам этэ үлэлэригэр, үөрэхтэригэр үрдүктэн үрдүк көрдөрүүлэри!

2024 сылга ыытыллыбыт Ыччат баала олус тэрээһиннээхтик ыытылынна, мин саныахпар, ыччат бары бу үтүөкэннээх күнү дуоһуйа сынньанан, түмсэн, күлэн-үөрэн атаарда.

Өссө да маннык сэргэх тэрээһиннэр буола турдуннар, ыччаттар бары бииргэ Өймөкөөммүт аатын ааттата туруоҕуҥ!

Ульяна Захарова, Өймөкөөн нэһилиэгин «Тымныы Оройо» култуура дьиэтин дириэктэрэ:

Мин «Творческая личность» диэн номинация хаһаайына буолбуппуттан соһуйдум да, үөрдүм да. Мин айар үлэбин сыаналаан талбыт хамыыһыйаҕа махталым муҥура суох.

Кыра эрдэхпиттэн үҥкүү, хомус ансаамбылларыгар солистыыр этим. Билигин да ол дьарыкпын ыһыктыбакка оҕолору үөрэтэ-такайа сылдьабын.

Араас хайысханан улуустааҕы, республикатааҕы куонкурустарга мэлдьи кыттабын. Сотору Дьокуускайга буолаары турар «Муус устар-2024» ыччат бэстибээлигэр хомус күрэҕэр финалга киирдим. Онно кыттарга билигин бэлэмнэнэ сылдьабын.

Анна, Павел Березкиннар дьиэ кэргэннэрэ, Уус-Ньара:

— Ыччат баалыгар биһиги «Бастыҥ эдэр дьиэ кэргэн» бочуоттаах аатыгар тигистибит. Улуус баһылыга Иван Максимовтан махтал суруктары уонна 20000 тыһ.сэртипикээт бэлэх тутаммыт олус үөрдүбүт.

Россияҕа Дьиэ кэргэн, Саха сиригэр Оҕо саас сылларынан улууспут бары олохтоохторун истиҥник эҕэрдэлиибит. Дьиэ кэргэн, төрөппүт оруола оҕо иитиитигэр сүҥкэнин өйдөөн туран, кэнчээри ыччаппыт ситиһиилээх, дьоллоох, төрөөбүт дойдутугар туһалаах, бэриниилээх буола улаатарыгар кыһаллыаҕыҥ, дьулуһуоҕуҥ диэн баҕа санаабытын барыгытыгар тиэрдэбит.

Сиһилии «Хотугу Сардаҥа» хаһыатыгар ааҕыҥ

Евдокия Егорова

Читайте дальше