Өймөкөөн ыччата успуорду талар

Соторутааҕыта Үчүгэй нэһилиэгиттэн төрүттээх Айтал Громов Дьокуускайга Алексей Никифоров сырдык кэриэһигэр ыытыллыбыт 23-гэр диэри саастаах юниордар хапсаҕайга өрөспүүбүлүкэтээҕи турнирдарыгар ситиһиилээхтик кыттынна.

Кини 85 кг диэри ыйааһыҥҥа финалга тиийэн, Кэбээйи улууһуттан сылдьар саамай титуллаах хапсаҕайдьыты Айсен Поскачины кыраһыабай быраҕыынан кыайан, “ыалдьааччыларыгар” улахан бэлэҕи оҥорбута.

Айтал төрөппүттэрэ Өймөкөөн улууһун төрүт олохтоох, убаастанар дьонун сыдьааннара. Громовтар уонна Березкиннар бэйэлэрин кэмнэригэр норуот хаһаайыстыбатын салааларыгар таһаарыылаахтык үлэлээбиттэрэ-хамсаабыттара биллэр.

Ыал аҕата Прохор Громов өбүгэтин үгэскэ кубулуйбут дьарыгын салҕааччы, табаһыт. Оттон улахан дьиэ кэргэн хаһаайката Наталья Кимовна улуустааҕы бибилэтиэкэ тиһигин биир тутаах үлэһитэ, кинилэр түөрт уолга күн сирин көрдөрбүттэрэ.

Айтал кэпсээбитинэн, кинини успуорка аҕалбыт киһинэн Үчүгэй орто оскуолатын физкультура учуутала Николай Исаков буолар. Уол оччолорго Томторго сыл аайы ыытыллар, РФ уонна СӨ успуорт маастара, наартаны ыстаныыга РФ уонна Саха сирин хас да төгүллээх чөмпүйүөнэ, өрөспүүбүлүкэ рекордсмена Николай Софронов тэрийэн ыытар Хотугу многоборьеҕа турнирыгар кыттыыттан успуорка олохтоохтук сыстыыта саҕаламмыта.

Оҕолорун баҕа санаатын, успуордунан үлүһүйүүтүн учуоттаан төрөппүттэрэ Айталы начаалынай кылааһы бүтэрбитин кэннэ бастаан Хаандыга улууһун Сайдыы нэһилиэгэр Оҕо-спортивнай оскуолатыгар үөрэттэрэ ыыппыттара. Муударай төрөппүттэр үүнэн эрэр эдэр киһи эниэргийэтин сөптөөх хайысханан салайарга маннык быһаарыы ылыннахтара. Түөрт уолу олоххо тус сыаллаах, уопсастыба туһалаах чилиэнэ буола улаатарыгар иитии манан дьыала буолбатах.

Айтал Сайдыыга биир сыл үөрэнэн баран, эһиилигэр бүтүн өрөспүүбүлүкэ үрдүнэн аатырар Д.П. Коркин аатынан олимпийскай резервэ Чурапчытааҕы спортивнай орто оскуола-интернатыгар үөрэнэ барбыта. Кини бу оскуолаҕа үөрэнэн дьиҥнээх спортсмен буола улаатарга хатарыллыбыта, туруоруммут сыалын ситиһэргэ уһуйуллубута ааспыта саарбахтаммат. Бу оскуоланы бүтэрэн баран Айтал аны Чурапчытааҕы физкультура уонна успуорт судаарыстыбаннай институтун устудьуона буолбута. Кини көҥүл тустууга Бүтүн Арасыыйатааҕы, өрөспүүбүлүкэтээҕи турдирдар хас төгүллээх призердара.

Эдэр киһи успуорду таһынан биир сөбүлүүр дьарыга – муусука. 20 саастаах уолчаан классическай муусукуны сөбүлээн истэрин сэргии, сэҥээрэ иһиттим. Арай, тустуук, модьу-таҕа уол интэриэһэ арыый атын буолуо диэх санаа киирэр эрээри, Громовтар уолаттара гитараҕа оонньуулларын, ыллыылларын истибитим. Айтал институт иһинэн ыытыллыбыт “Устудьуон куолаһа” диэн куонкуруска Гран-при хаһаайына буолан турардаах. Эдэр киһи саха эстрадатын сулустарыттан Байбал Сэмэнэп ырыаларын сөбүлүүрүн, бу ырыаһыты кумир оҥосторун туһунан кэпсиир.

Айталтан инники олоххун хайдах көрөҕүн, туох үлэһит буолуоххун баҕараҕын диэн ыйыппыппар: “Педагог буолуохпун баҕарабын, олохпун успуорт өттүнэн көрөбүн”, — диэтэ. Онон эдэр киһи үөрэҕин этэҥҥэ бүтэрэн, физкультура учуутала биитэр тириэньэр буолан, Саха сиригэр успуорт сайдыытыгар бэйэтин кылаатын киллэрэн, талбыт хайысхатынан өрүү ситиһиилэннин, олох киэҥ аартыгар этэҥҥэ үктэннин диэн сэмээр баҕарыаҕыҥ.

Любовь Кривошапкина

Читайте дальше