Альтернативнай сурутуу диэн улуустааҕы хаһыаттары эрэдээксийэҕэ ааҕааччы бэйэтэ суруйтарыыта ааттанар. Ол быһыытынан сурутааччы хаһыаттарын тэрилтэттэн бэйэтэ кэлэн ылыахтаах.
Оттон ханнык баҕарар хаһыаты, сурунаалы почта нөҥүө сурутар буоллахха, бу бэчээти тустаах тэрилтэ үлэһиттэрэ аадырыска диэри тиэрдэр эбээһинэстээхтэр.
Улуустааҕы “Севернай заря”-“Хотугу сардаҥа” хаһыаттар эрэдээксийэлэрэ хас даҕаны сыллааҕыта почта сырыыта быстар мөлтөҕүн учуоттаан, сурутууну эрэдээксийэҕэ бэйэтигэр ыытар туһунан быһаарыы ылыммыта. Альтернативнай сурутуу биир уратытынан өссө хаһыаттар сыаналара почтатааҕар арыый чэпчэки сыаналааҕа буолар.
Биһиэхэ манна хас нэһилиэк аайы уопсастыбаннай көмөлөһөөччүлэрбит күн бүгүҥҥээҥҥэ диэри күүс-көмө буолан кэллилэр. Кинилэр бу үлэлэригэр кэлтэгэй кэппиэйкэни да ылбаттарын тоһоҕолоон бэлиэтиэхпин баҕарабын. Өймөкөөн куустатыгар таксист Гаврил Сивцев Томтор, ол иһигэр Үчүгэй, Өймөкөөн, Сордоҥноох нэһилиэктэрин хаһыаттарын эмиэ буор-босхо, айанныырын тухары тиэрдэн кэллэ. Маны этэн эрдэхтэрэ, үтүө санааланыы бастыҥ холобура диэн.
Оттон Төрүт нэһилиэгэр олохтоохтор эрэдээксийэҕэ суруппут хаһыаттарын ардыгар дьаһалта, сороҕор атын тэрилтэлэр үлэһиттэрэ улуус киинигэр кэллэхтэринэ ылан барааччылар. Биитэр бу нэһилиэккэ сурутууну ыытар эрэллээх көмөлөһөөччүбүт, бибилэтиэкэр Нина Чачуа батсаабынан Төрүттэн ким Уус-Ньараҕа айаннаабытын биллэрэн ылларааччы.
Биллэн турар, хас биирдии сурутааччы хаһыатын кэмигэр тутан сонуну-нуомаһы тутатына истэ-билэ туруон баҕарар.
Онон, нэһилиэктэр дьаһалталарын баһылыктарыгар туһаайан, кумааҕы хаһыаттар үйэлэрэ уһууругар өйөбүл буолан, олохтоох бэчээти миэстэтигэр тиэрдиигэ күүс-көмө буолуохтара диэн эрэнэн туран, биһигини кытта бииргэ буоларга ыҥырабыт.
Өймөкөөн нэһилиэгэр хаһыаттары сурутуунан учуутал Агафья Готовцева сыралаах үлэтиттэн быыс булан дьарыктанар, киниэхэ махталбыт муҥура суох. Атын нэһилиэктэргэ бибилэтиэкэрдэр сурутуу ыытан, биһиэхэ эмиэ улахан өйөбүл буолаллар. Кинилэр улуус хаһыаттара элбэх сурутааччыланалларын туһугар кыһаллаллара хайҕаллаах дьыала. Ол – Томторго Надежда Литвинцева, Сордоҥнооххо – Мария Никифорова, Үчүгэйгэ – Наталья Громова.
Кэлэр 2024 с. сурутуу хампаанньата бара турар. Күндү улуус олохтоохторо, улуустааҕы “Севернай заря”-“Хотугу сардаҥа” хаһыаттаргытыгар сыл бүтэрин күүппэккэ, билиҥҥиттэн сурутаргытыгар ыҥырабыт. Сурутууну сыл аҥаарыгар буолбакка, биир сылга оҥороргутугар сүбэлиибит.
Улуус дьоно кэлэр да сылга биһигинниин буолуоххут диэн улаханнык эрэнэбит.