Соторутааҕыта Дьокуускайга «Александр Егорович Кривошапкин. Путь инженера» кинигэ тахсыбытынан, кини туһунан ахтыы биэчэрэ буолан ааспыта.
Кинигэҕэ Өймөкөөн улууһун Төрүт нэһилиэгиттэн төрүттээх, улуус уһулуччу киһитин, ааттаах-суоллаах атыыһыт Н.О. Кривошапкин аҕа ууһун үтүө утумнааччыта, СӨ Тыа хаһаайыстыбатын министиэристибэтигэр, өрөспүүбүлүкэҕэ информатизацияны, IT, сибээһи уонна аныгы технологиялары үлэҕэ, олоххо туһаныыга инники күөҥҥэ таһаарбыт ураты кылааттаах чаҕылхай инженер-системотехник Александр Егорович Кривошапкин олоҕун, үлэтин туһунан сурулунна.
Кинигэ сүрэхтэниитигэр А.Е. Кривошапкины кытта бииргэ үлэлээбит дьоно-сэргэтэ, үгүс доҕотторо, аймахтара, дьиэ кэргэнэ кытыннылар.
Тэрээһиҥҥэ А.Е. Кривошапкин Тыа хаһаайыстыбатын министиэристибэтигэр үлэтин суолтатын олус үчүгэйдик, толору урут миниистиринэн үлэлээбит, билигин “Саха ынаҕа” тэрилтэ салайааччыта А.Е. Артемьев аҕынна. Кини Кривошапкин чаҕылхай, хатыламмат ураты инженер буоларын туоһутунан Тыа хаһаайыстыбатын министиэристибэтэ 2000 сс. саҥаларыгар былаас уорганнарын бары министиэристибэлэригэр информатизацияҕа, компьютеризацияҕа, сибээһинэн хааччыллыыга инники күөҥҥэ испитэ диэтэ. “Улахан тэхэньиичэскэй өрөбөлүссүйэни оҥорбут киһинэн Александр Егорович Кривошапкин буолар”, — диэн тоһоҕолоон бэлиэтээтэ.
Ыраах таба ыстаадаларыгар, сылгы базаларыгар, сүөһү сайылыктарыгар күн уотунан үлэлиир батареянан уот-күөс эрэ буолбакка, интернет, сибээс кытары тиийэрин, бухгалтерия отчуотун уруккулуу ыраах айаҥҥа туруммакка, компьютерынан ыытары Александр Егорович тэрилтэтэ ситиспитин туһунан министиэристибэ биир тутаах департаменын уһуннук салайбыт В.Т. Лукин, Өймөкөөн улууһун тыа хаһаайыстыбатын управлениетыгар өр сылларга үлэлээбит Р.М. Атласов бигэргэттилэр.
Александр Егорович чулуу атыыһыт Н.О. Кривошапкин аҕа ууһуттан төрүттээх этэ. Онон чаҕылхай биир дойдулааҕын суолун хаҥатан, аатын ааттатан Дьокуускайга үлэлиир 5 №-дээх оскуолаҕа А.Е. Кривошапкин попечитель быһыытынан сүүрбэччэ сыл үлэлээбитэ. Бу оскуола саҥа таас дьиэлэнэригэр, оскуолаҕа атыыһыт Кырбаһааҥкын аата иҥэриллэригэр турарыгар Александр Егорович быһаччы кылааттаах. Олоҕун тиһэх күнүгэр диэри оскуолатыгар тиийэ, оҕолору кытары көрсөн, өйөөн сылдьыбытын туһунан кинигэҕэ оскуола дириэктэрдэрэ ырылыччы суруйбуттар.
Александр сэттэ улахан эдьиийдэригэр быраат этэ. Ол да буоллар, чуолаан кини Кривошапкиннар аҕа ууһун эрэллээх, тулхадыйбат үөһэ буолара. Эдьиийдэрин, тапталлаах кэргэнин Дора Михайловнаны, улалттарын Иваны, Сергейи сылаас, истиҥ тапталынан угуттаан олоҕун олорбута. Онон кинигэ матырыйаалларын хомуйбут кэргэнигэр Дора Михайловнаҕа Александр чугас дьоно бука бары махталларын биллэрдилэр.
Бу туһунан сиһилии “Хотугу сардаҥа” хаһыакка ааҕыҥ.
Татьяна Обулахова, СӨ тыа хаһаайыстыбатын, бэчээтин туйгуна, Дьокуускай