Соторутааҕыта Төрүт нэһилиэгин П.Я. Тулааһынап аатынан Норуот айымньытын дьиэтигэр хас даҕаны үрдүк таһымнаах тэрээһиннэр буоллулар. Олортон биирдэстэригэр бу нэһилиэккэ кулууп уонна бибилэтиэкэ аһыллыбыттара 70 сыллаах үбүлүөйдэрэ бэлиэтэннэ, оттон иккис чааһыгар саҥа кинигэ сүрэхтэниитэ ыытылынна.
Тэрээһин иккис чааһын туһунан кэпсээтэххэ, төрөөбүт төрүт дойдубар мин икки кинигэм тэҥҥэ сүрэхтэннэ. «Тарын Үрэх – Төрүт” диэн бастакы кинигэм бу иннинэ Томтор бибилэтиэкэтигэр билиһиннэриини ааспыта.
Быйылгы «Кыайыыны уһансыыга Тарын Үрэх дьонун кылаата» диэн өйдөбүнньүк хомуурунньугум Тарын, Төрүт дьонун бука барыларын көмөтүнэн бэрт түргэнник күн сирин көрдө. Манна180 киһи аата-суола, 200-тэн тахса ахтыы хомуллан киирдэ. Онон дойдум дьоно кэнчээри ыччаттарыгар үйэлээх бэлэх оҥордулар.
Мин умнуллубат, сырдык киэһэни бэлэхтээбит олохтоох дьаһалта үлэһиттэригэр уонна дьокутааттарга, сүүрбүт-көппүт, тэрийсибит дьоммор-сэргэбэр барыларыгар махталым муҥура суох.
Бу күн нэһилиэк уопсастыбанньыктара, дьокутааттар, ыччат дьон мусуойбутугар мустан санаабытын үллэстэн, инникигэ сайдыыны торумнаан, киэһэ хойукка диэри истиҥник кэпсэттибит.
Бу туһунан сиһилии “Хотугу сардаҥа” хаһыакка ааҕыҥ.
Зоя Оконешникова, кыраайы үөрэтээччи, Төрүт