… Кубулҕаттаах сааскы күн буолан, халлаан киэһэрэн, дьыбар түһэн, тымныйбыта биллэрэ.
Мин киинэттэн тахсыыбар, почта үрдүгэр ыйанан турар араадьыйа бөһүөлэги биир гына тыаһыы турара. Арай араадьыйаҕа мин олус таптыыр ырыаһытым Валентина Толкунова «Поговори со мною, мама …» ырыатын биэрдилэр.
Эмискэ тохтоон иһиллээн турдум уонна суһуктуйан турар халлааҥҥа былыт быыһыттан уун-утары бу дьэнтэллэн турар уп-улахан кытархайдыҥы туолан турар ыйы көрөөт, бииргэ ыллаһан барбытым: «Поговори со мною, мама… О чём-нибудь поговори… До звёздной полночи до самой… Мне снова детство подари...».
Айылҕа бу дьикти романтичнай көстүүтүн доҕуһуоллаабыт Валентина Толкунова ити нарын ырыата миэхэ, 13 саастаах кыысчааҥҥа, көмүс симфония буолан иһиллибитэ.
Ийэм аатырбыт пилимиэнэ
Ханна да тиийиим, ийэм миэхэ, оҕотугар, бэйэтин тапталын иҥэрбит минньигэс аһа өрүү батыһа сылдьыбыта. Бүлүү педучилищетыгар уонна университекка үөрэммит дьүөгэлэрбин кытта устудьуоннааҕы сылларбын аҕыннахпытына, мин ийэм пилимиэнэ хайаан да ахтыллар. Дьикти да кэм кэлэн ааспыт эбит. Ыраах Өймөкөөн Төрүтүттэн ийэм Бүлүүгэ буоллун, Дьокуускайга буоллун, субу-субу кэһии ыытара. 80-с сыллар саҥаларыгар «Держать в холоде» диэн баһыылканы ыйга үстэ-түөртэ тутар этим.
Олоххо көхтөөх киһи
Быйыл ийэм үбүлүөйдээх 90 сааһын бэлиэтиир. “Үйэлээх саас” диэн дорҕоонноохтук этэр ытык сааска тиийдэ. Бу уон сыл устатыгар ийэм Москубаҕа “Бэс Чагдаҕа” сынньана баран кэлэн, биир дойдулаахтарын соһуппуттаах. 85 сааһыгар ити мин бэлэҕим этэ.
Кырдьаҕас киһи 85 үбүлүөйдээх сааһыгар ыраах айаны тулуйан, икки нэдиэлэттэн ордук Москубаҕа “Бэс Чагдаҕа” сынньанан кэлбиппит. Билигин санаатахпына, саастаах киһи диэтэххэ, ыраах айаҥҥа сылдьарга кытаанах санаалаах эбит. Миэхэ эрэнэрэ оччо буоллаҕа.
Олоххо көхтөөх, итинник сырдык ыралаах буолан уһун үйэлээхтэр кэккэлэригэр сылдьар дии саныыбын. Билигин да доруобуйата кыайдар, туох эрэ уһулуччулааҕы оҥоруон баҕарара баар суол.
“Өрүү бүгүҥҥүҥ курдук, кэрэни, үтүөнү, үйэлээҕи түстүү сырыт дуу, ийэкэм барахсан!” диэн алгыспын эттэҕим буоллун!
Бу туһунан сиһилии “Хотугу сардаҥа” хаһыакка ааҕаарыҥ.
Елена Потоцкая