Өймөкөөн улууһун Үчүгэй нэһилиэгин ытыктанар олохтоохторуттан биирдэстэрэ Виталий Павлович Попов 80 саастаах өрөгөйдөөх үбүлүөйүн бэлиэтээтэ. Кини олоҕун устата үлэ үөһүгэр сылдьан, үлэни-хамнаһы өрө туппут киһи.
Виталий Павлович кэргэнинээн Тамара Гаврильевналыын 6 оҕоҕо күн сирин көрдөрбүттэрэ. Кинилэр билигин 9 сиэн, 3 хос сиэн тапталлаах эһэтэ, эбэтэ буолан олороллор.
Билигин Мирнэй куоракка олорор хореограф идэлээх Виталий Павлович кыыһа Дария Луковцева аҕатын туһунан маннык кэпсиир:
— Биһиги аҕабыт дьиҥэр 1946 сыл кулун тутар 25 күнүгэр күн сирин көрбүт эбит. Ону соҕотох оҕону оччолорго эбэтэ Попова Мария Иннокентьевна “абааһыттан” күрэтэн төрөөбүт күнүн уларытан, муус устар 1 күнүнээҕи төрүөх диэн докумуоҥҥа киллэттэрбит. Онон кини миэтирикэтигэр 1946 с. муус устар 1 күнүгэр кырдьаҕас Өймөкөөҥҥө төрөөбүт диэн суруллубут. Ийэтэ, биһиги эбэбит Попова Харитина Романовна диэн этэ.
Аҕабыт Виталий Павлович эдэр эрдэҕиттэн успуордунан умсугуйан туран дьарыктанар эбит. Кини: “1971 с. сайын Дьокуускай куоракка буолбут землячество тэрээһинигэр чугас дистанцияҕа сүүрүүгэ бастаабыппар суруйааччы Николай Максимович Заболоцкай бэркэ үөрэн эҕэрдэлээбитэ уонна мин төрөөбүт-үөскээбит Үчүгэйбиттэн маннык сүүрүк оҕо баарын саҥа биллим диэбитэ”, — диэн өрүү киэн тутта кэпсээччи.
Аҕабыт остуол тенниһигэр олус табыллан оонньуур. Кини бу көрүҥҥэ улуус хас да төгүллээх чөмпүйүөнэ. Саахымакка, дуобакка эмиэ аҕабытын кыайар киһи ахсааннаах, оттон теннискэ эдэрдэртэн кинини хоппут киһи диэн суох. Биир сиэнэ Стас, эмиэ бэйэбит курдук, эһэтин туйаҕын хатаран теннисист. Таатта улууһун, өрөспүүбүлүкэ хас да төгүллээх чөмпүйүөнэ, призера.
Үчүгэй нэһилиэгэр ыытыллар күрэстэргэ аҕабыт билигин даҕаны көхтөөхтүк кыттарыттан, олох үөһүгэр сылдьарыттан биһиги олус үөрэбит, киэн туттабыт.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина