Бүгүн педагог-учуонай, уопсастыбаннай диэйэтэл, суруналыыс, Үчүгэй оскуолатын бастакы дириэктэрэ, Үчүгэй нэһилиэгин бастакы баһылыга, киһи киэнэ кэрэмэһэ Маргарита Егоровна Винокурова 75 сааһын туолар өрөгөйдөөх үбүлүөйэ бэлиэтэнэр.
М.Е. Винокурова 1950 с. ахсынньы 28 күнүгэр Сунтаар улууһугар күн сирин көрбүтэ. Кини СӨ үтүөлээх үлэһитэ, РФ норуот үөрэҕириитин туйгуна, СӨ Учууталлар учууталлара, Саха сирин методиһа, педагогическай билим хандьыдаата, Өймөкөөн уонна Эбээн-Бытантай улуустарын Бочуоттаах олохтооҕо, РФ суруналыыстарын сойууһун чилиэнэ, “Арассыыйа патриота” Бүтүн Арассыыйатааҕы бириэмийэ, суруналыыстыкаҕа өрөспүүбүлүкэтээҕи үгүс бириэмийэлэр лауреаттара, “Уһун Дьурантаайы” саха тыллаах суруналыыстыка аһаҕас күрэҕэр “Туоһу сурук”, “Көх” анал биһирэбилин хаһаайына о.д.а. улахан суолталаах наҕараадалардаах.
Маргарита Егоровна олоҕун эрэллээх аргыһынаан Василий Степановичтыын 1988 с. Эбээн-Бытантай улууһугар таһаарыылаахтык үлэлии-хамсыы сылдьан дьиэ кэргэнинэн Өймөкөөҥҥө көһөн кэлбиттэрэ. В.С. Винокуров ол сылларга саҥа тэриллибит “Үчүгэй” сопхуос дириэктэринэн ананан, үтүө суобастаахтык үлэлээбитэ.
Онтон Маргарита Егоровна кыра нэһилиэккэ тутаах тэрилтэнэн буолуохтаах оскуоланы 11 кылаастаах оҥорорго бары күүһүн-уоҕун биэрбитэ, тэрилтэни каадырдарынан хааччыйыы, материальнай-тэхэньиичэскэй базаны хаҥатыы курдук эппиэттээх үлэҕэ күүстээхтик ылсыбыта.
Мин оскуола номнуо 11 кылаастаах буолбутун кэннэ 1990 с. Дьокуускайдааҕы педагогическай училищены бүтэрэн Өймөкөөн улууһугар направлениенан үлэлии кэлбитим. Оччолорго Сэбиэскэй Сойуус өссө ыһылла илик этэ. Бэл, 1-кы кылаас үөрэнээччилэрин октябреноктар кэккэлэригэр ылбыппыт. Онон 1990 с. оскуола боруогун саҥа атыллаабыт үөрэнээччилэрим, 1983 сыллаах төрүөхтэр, бүтэһик октябреноктар. Онтон улугуруу диэн ааттанар улахан уларыта тутуу сыллара саҕаламмыта, олох-дьаһах тосту-туора уларыйбыта.
Мин Уус-Ньараҕа 1990 сыл атырдьах ыйын 15 күнүгэр аан бастакыбын үктэммитим. Аэропорка сөмөлүөттэн түһээт, дьэ, кырдьык даҕаны халлааҥҥа харбаспыт, былыттары хаарыйар хайалары көрөөт олус сөхпүтүм, соһуйбутум баччааҥҥа да дылы ааспат диэххэ сөп.
Учууталлар атырдьах ыйынааҕы сүбэ мунньахтара билиҥҥи “Пегас” дьиэтигэр ыытыллыбыта. Мин онно аан бастаан Маргарита Егоровнаны көрсүбүтүм.
Үчүгэй орто оскуолатыгар араас улуустартан төрүттээх эдэр учууталлар М.Е. Винокурова салалтатынан олус иллээхтик-эйэлээхтик, айымньылаахтык үлэлээбиппит. Маргарита Егоровна уонна Василий Степанович эдэр исписэлиистэргэ ийэлии истиҥ, аҕалыы амарах сыһыаннаахтара. Кинилэр биһигини олорор дьиэнэн хааччыйбыттарын таһынан, аспытыгар-таҥаспытыгар тиийэ дьаһайан көмөлөһөллөрө. Оччолорго үлэлээбит учууталлар дириэктэрбит бастакы каникулга барыбытын дойдубутугар ыытан, ахтылҕаммытын таһааттарбытын күн бүгүҥҥээҥҥэ дылы махталынан саныыбыт. Итинэн кини каадырдары олохсутарга кыһалларын көрдөрбүтэ. Маргарита Егоровна биһиэхэ өрүүтүн сүбэлии, бэйэтин баай уопутуттан үллэстэ сылдьара, барыбытыгар олус эйэҕэстик сыһыаннаһара.
Сопхуос өттүттэн өйбүл эмиэ туох да баһаам этэ. Онон Винокуровтар оччолорго нэһилиэккэ үлэлээбит-хамсаабыт исписэлиистэргэ – учууталларга, иитээччилэргэ, буҕаалтырдарга, тыа хаһаайыстыбатын исписэлиистэригэр сөптөөх усулуобуйаны тэрийэри инники күөҥҥэ туппуттара.
Үчүгэйгэ Винокуровтар баалларын саҕана үлэлээбит исписэлиистэр үгүстэрэ билигин бэйэлэрин эйгэлэригэр ситиһиилэнэн, убаастанар үтүө үлэһит буола сылдьаллар, сыралаах үлэлэрэ сыаналанан бочуоттаах ааттаннылар, үрдүк да наҕараадаланнылар.
Маргарита Егоровна кэлин нэһилиэк баһылыгынан талыллан баран, үтүмэн үгүс үлэтин быыһыгар, учууталларын туһунан эмиэ умнубат этэ. Кини ыччаты олус өйүүрэ, куустатааҕы куонкурустарга, бэстибээллэргэ кытталларын, нэһилиэктэринэн гастролларга сылдьалларын көҕүлээн өрүү көмөлөһөрө.
М.Е. Винокурова өҥөтүнэн Үчүгэй нэһилиэгэр орто оскуола аһыллан, олохтоох оҕолор төрөөбүт түөлбэлэриттэн тэйбэккэ орто үөрэхтэнэн, олох киэҥ аартыгар үктэнэллэр. Бу оскуола саҥа аһыллар кэмигэр учууталынан үлэлии кэлбит Валентина Карпова күн бүгүн оскуола дириэктэринэн ситиһиилээхтик үлэлиир. Оскуола кэлэктиибэ тэрилтэ үтүө үгэстэрин илдьэ сылдьан улууска бастыҥнар кэккэлэригэр киирсэрэ кэрэхсэбиллээх.
Бу нэдиэлэҕэ Үчүгэй нэһилиэгэр 60 миэстэлээх саҥа оскуола аһыллыытын үөрүүлээх түгэнэ тосхойдо. Улахан суолталаах тэрээһиҥҥэ Ил Дархан Айсен Николаев кытынна, улуус салалтата, ыҥырыылаах ыалдьыттар саҥа тутууну арыйыы сиэригэр-туомугар сырыттылар.
Билигин киин куоракка, араас улуустарга таһаарыылаахтык үлэлии сылдьар, үлэлэрин Маргарита Егоровна салалтатынан саҕалаабыт Альбина Громова, Татьяна Заболоцкая, Елена Лебедева, Мария Соколова, Мария Карпова о.д.а. учууталлар “Винокуровтар ханнык да кэм буоллар олоҕу баарынан ылынан, кини угуттуур күүһүгэр бэринэн, тулалыыр эйгэ, быһыы-майгы үтүө өрүтүн эрэ чорбото, ону дьоҥҥо-сэргэҕэ тиэрдэ сатыыр үгэстээхтэр”, — диэн этэн туран, күндү Маргарита Егоровнаны үбүлүөйүнэн итиитик-истиҥник ис сүрэхтэн эҕэрдэлииллэр, чэгиэн-чэбдик доруобуйаны, дьолу-соргуну баҕараллар. Оҕолоро, сиэннэрэ этэҥҥэ сылдьан эйэҕэс эбэни Маргарита Егоровнаны үөрдэ-көтүтэ, харыстыы, араҥаччылыы сырыттыннар!
Любовь Кривошапкина