Дьыл-хонук түргэнник да ааһар. Бу эрэ баар курдук этэ дии, 1988 сыл эп-эдэркээн, 20-н эрэ ааспыт, саҥа олоххо үктэнэн эрэр кэргэннии исписэлиистэр Валентина уонна Петр Карповтар Үчүгэй нэһилиэгэр саҥа аһыллан үлэлээн эрэр оскуолаҕа сиэттиспитинэн кэлбиттэрэ.
Валентина Кимовна бу сыллар усталарыгар биһиги дьиэ кэргэн арыйтарбыт Үчүгэй орто оскуолатыгар учууталынан, онтон дириэктэринэн үтүө суобастаахтык үлэлээн, күн бүгүҥҥэ диэри ситиһиилээхтик айа-тута, кэнчээри ыччаты иитэн-үөрэтэн олох киэҥ аартыгар көтүтэ сылдьара олус үөрдэр. Онон киниэхэ ис сүрэхпититтэн махтанабыт.
В.К. Карпова үтүө үгэһи салҕаан, күн бүгүнүгэр диэри оскуолабыт уота-күөһэ умуллубакка үлэлии турара кэрэхсэбиллээх.
Ытыктабыллаах Валентина Кимовнаны ис дууһабытыттан кэрэ-бэлиэ үбүлүөйдээх күнүнэн итиитик истиҥҥик эҕэрдэлиибит. Эйиэхэ кытаанах доруобуйаны, туох баар сырдыгы, үтүөнү, дьолу, бар дьонуҥ махталын баҕарабыт. Санаабытыҥ сатаннын, толкуйдаабытыҥ тобулуннун!
Бу туһунан сиһилии “Хотугу сардаҥа” хаһыакка ааҕыҥ.
Маргарита Егоровна уонна Василий Степанович Винокуровтар, Дьокуускай