Соторутааҕыта Монголия Улан-Батор куоратыгар Аан дойдутааҕы ат күнүн уонна «Наадам» чэрчитинэн «Өбүгэлэрбит нэһилиэстибэлэрэ» диэн Аан дойдутааҕы ат күнүгэр анаммыт историческай суолталаах бырааһынньыкка биһиги биир дойдулаахтарбыт кыттан тус кылааттарын киллэрдилэр.
Манна экстремал айанньыт, сылгыһыт Дугуйдаан Винокуров төрөппүттэрин, өбүгэ төрүт дьарыгын илдьэ сылдьар, сылгы иитиитинэн утумнаан дьарыктанар Семен Львович уонна Ирина Христофоровна Винокуровтары, норуот маастара Мария Винокурованы кытта Саха сирин дэлэгээссийэтин састаабыгар киирэн сырыттылар.
Бу сырыы туһунан Мария Винокурова маннык кэпсээтэ:
— Монголия курдук ыраах сиргэ Өймөкөөнү ааттатан кыттан кэллибит. Ат параада олус киэҥ далааһыннаахтык ааста. Ирина, Сэмэн, Дугуйдаан Винокуровтар параадка кытыннылар. Итини тэҥэ биһиги дэлэгээссийэбит ат ыҥыырын быыстапкатыгар кыттыста.
Ураһаҕа Ирина, Семен Винокуровтар дьиэ кэргэттэрэ астаан аҕалбыт сахалыы маанылаах астарынан ыалдьыттары күндүлээтилэр. Мин сылгы түүтүттэн оҥоһуктарбын Монголия бэрэсидьиэнигэр, кини көмөлөһөөччүтүгэр уонна тылбаасчыкка Саха сирин дэлэгээссийэтин аатыттан бэлэхтээтибит.
Ирина Винокурова санаатын маннык эттэ:
— Монголия бэрэсидьиэнэ тыл көтөҕөн, бу Аан дойдутааҕы сылгы бырааһынньыга тэрилиннэ. Манна 56 араас дойдуттан элбэх киһи тоҕуоруһа мустубуттара. Түмсүүбүт салайааччыта — Яна Игнатьева. Дэлэгээссийэ састаабыгар 13 киһи киирбитэ. Дьокуускайтан “Симэх” национальнай киин аатыттан уонна Өймөкөөн улууһуттан удьуор сылгыһыттар биһиги дьиэ кэргэн кыттыыны ыллыбыт.
Бу дойдуга сылгы, бараан, дьиэ кыыла элбэҕин сөҕө көрдүбүт. Оҕолуун-уруулуун бары акка мэҥэстэ сылдьаллар, дьиэ кыылын таптаан иитэллэр эбит диэн бэлиэтии көрдүбүт.
Улахан параадка кыттан олус дуоһуйдубут, астынныбыт. Кэргэним Семен Львович “Дьиҥнээх ыһыах курдук бырааһынньыкка сырыттыбыт”, — диэн үөрэн эттэ. Бырабыыталыстыба ураһатыгар Монголия бэрэсидьиэнин сүбэһитин кытта атах-тэпсэн олорон кэпсэттибит. Бу норуот сылгынан утумнаахтык дьарыктанарын илэ харахпытынан көрөн олус дуоһуйан, барытын сэргээн кэллибит.
Оттон Дугуйдаан Винокуров санаатын маннык үллэһиннэ:
— Монголияҕа ыытыллыбыт Аан дойдутааҕы сылгы бэстибээлэ мин олохпун, көрүүбүн тосту уларытта. Монгол норуотун тыа хаһаайыстыбатын, ат иитиитин күүстээх үгэстэрин көрөн олус диэн сөхтүм. Омук быһыытынан монголлар аты иитиигэ быдан үрдүк таһымҥа сылдьаллар эбит. Бу кинилэр олохторун, култуураларын сүнньэ, омуктарын кэскилэ буоларын көрдөрөр.
Хомойуох иһин, биһиги бэйэбит аттарбытын сатаан илдьибэтэхпит. Маннык бэстибээл сыл ахсын ыытыллар буолан, эһиил тус бэйэм аппынан тиийэн кыттар баҕалаахпын. Оччоҕуна саха атын күүһүн-уоҕун атын омуктарга көрдөрүөхпүт.
Үгүс тэрээһинтэн монголлар Дьөһөгөй оҕотун иитиигэ улахан таһымҥа сылдьалларын сөҕө-махтайа көрдүм.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова