Оҕону үлэнэн иитиигэ болҕомтону ууран

Өймөкөөн улууһун биир ытыктанар олохтооҕо, СӨ Тыа хаһаайыстыбатын туйгуна, үлэ бэтэрээнэ Марта Дягилева тымныытынан аатырар улуус саамай кэрэ айылҕалаах Сордоҥноох нэһилиэгиттэн төрүттээх. Кини 1983 с. ветеринарнай техникуму бүтэрэн баран, дойдутугар «Өймөкөөн» сопхуостан саҕалаан бэтэринээринэн үлэлээбитэ. 

Марта Тимофеевна 42 сыл устата харыс да сири халбаҥнаабакка Сордоҥнооҕор олорон, бэтэринээр идэтин кытта олоҕун ситимнээбитэ. Кини 1993 сыллаахха  нэһилиэгин уолунаан Михаил Винокуровтыын ыал буолан, 31 сыл устата иллээхтик-эйэлээхтик олорон кэллилэр. Кинилэр саха үгэһин утумнаан, ынах сүөһү, сылгы ииттибиттэрэ быйыл 24-с сылыгар барда.

Билигин уопсайа 11 хороҕор муостааҕы, ол иһигэр 5 ыанар ынаҕы иитэллэр. Ону таһынан хаһаайыстыбаларыгар 16 куурусса, 4 кус, 4 хаас баар.

Сайын аайы биһиги сайылыкпытыгар көһөн тахсабыт, — диэн сэһэргиир улахан ыал хаһаайката. — Онно оттуубут, чугас сиринэн сир астыыбыт. Маны тэҥэ оҕолорго анаан үлэ лааҕырын тэрийэн үлэлэппиппит хаһыс даҕаны сыла. Сайыҥҥы лааҕырга билигин 10-ча оҕо сылдьар. Дьокуускай куораттан үс, Өлөөн улууһуттан биир оҕо кэлбитэ, Томтор нэһилиэгиттэн эмиэ бааллар. Манна үксүн уолаттар сылдьан сынньалаҥнарын туһалаахтык атаараллар, ону тэҥэ үлэ үөрүйэхтэригэр уһуйуллаллар. Кэргэним Михаил Прокопьевич уолаттары мас мастыырга, от охсорго, уһанарга үөрэтэр.

Мин сайыҥҥы кэмҥэ өлгөм астаах, минньигэс амтаннаах араас оҕуруот аһын үүннэрэбин. Бэйэ бородууксуйата быдан амтаннаах, иҥэмтэлээх буоллаҕа.

Кэргэним Михаил Прокопьевич үлэһит бэрдэ, кини биһиги дьиэ кэргэн дурдабыт-хаххабыт, эрэллээх эркиммит буолар.

Марта Тимофеевна улуус эдэр дьоно сылгы, ынах сүөһү ииттэнтыа сирин сайдыытыгар кылааттарын киллэрсэллэрэ буоллар диэн баҕа санаалаах.

Бу туһунан сиһилии “Хотугу сардаҥа” хаһыакка ааҕыҥ.

Евдокия Егорова

Хаартыскалар —

дьиэ кэргэн архыыбыттан

Читайте дальше