Саха Өрөспүүбүлүкэтин судаарыстыбаннай былааһын толорор уорганнарын 2025 сыллааҕы үлэни отчуоттуур бөлөх олунньу 17-20 күннэригэр Өймөкөөн улууһугар үлэлээтэ.
Биһиги сорох министиэристибэлэр бэрэстэбиитэллэрин кытта көрсөн кэпсэттибит.
Владимир Сыроватскай, СӨ Тыа хаһаайыстыбатын министиэристибэтин түргэнник сайдар салаа, племенной дьыала, кооперация уонна хаһаайыннааһын кыра көрүҥнэрин сайыннарыы Департаменын кылааһый исписэлииһэ:
— Мин бырабыыталыстыба отчуоттуур бөлөҕүн састаабыгар киирсэн быйыл эмиэ Өймөкөөн улууһугар кэллим. Улуустааҕы Тыа хаһаайыстыбатын управлениетын салайааччытын Инна Яковлеваны кытта көрсөн, баар балаһыанньаны билистим. Кини бэлиэтииринэн, улууска кыстык этэҥҥэ ааһан эрэр. Былырыын сайыҥҥы халаан уутун кэнниттэн СӨ Тыа хаһаайыстыбатын министиэристибэтин көмөтүнэн сайаапка биэрбит хаһаайыстыбаларга от улууска тиэрдиллибитэ. Сылгы туруга үчүгэй дииллэр. Былырыыҥҥы дааннайы кытта тэҥнээтэххэ, сүөһү ахсаана бэрт кыратык, аҕыйах төбөнөн аҕыйаабыт. Сылгыга эмиэ оннук көрдөрүү. Онон улуус тыа хаһаайыстыбатын бородууксуйатын оҥорон таһаарааччылара кыстыгы этэҥҥэ туоруулларыгар эрэл санаалаахпыт.
Дьон биир үксүн мелиорация үлэтин ыытыыны уонна өртөөһүн боппуруоһун туруорсар. Өртөөһүн — ыарахан боппуруос, бу — РФ сокуонунан бобуллан турар. Хаһаайыстыбалаахтар сирдэрэ ойуур пуондатыгар баар эрэ буоллаҕына, күүстээх хонтуруолунан бү үлэни тэрийиэххэ сөбүн дьон өйдүөх тустаах.
Семен Коркин, СӨ тырааныспар министиэристибэтин солбуйааччыта:
— Былырыыҥҥы халаан уута эрэгийиэннээҕи суолга улахан хоромньуну таһаарбыта. Чөлүгэр түһэрии үлэтин чэрчитинэн барыта оҥоһуллан, бу күннээххэ суол эмсэҕэлээбит учаастактара өрөмүөннэммиттэрэ. Өймөкөөн улууһугар улахан болҕомтону Сунтаар уонна Агаякан үрэхтэри туоруур муосталар ылаллар. Билигин муосталары “Дороги Саха” САО көрөр-истэр. Бу бэдэрээтчит үс сылга түһэрсибит хантараага быйылгынан бүтэр, ону салҕаан өссө үс сылга уһатар былааннаахпыт.
Семен Николаевич өссө: “Быйыл Маҥан — Өймөкөөн — Маҥан хайысханан АН-3 сөмөлүөт сылдьара былааҥҥа баар гынан баран, субсидия харчыта кэмчитинэн, билиэттэр анал коммерческай сыананан атыыланыахтара. Былырыын Томторго диэри 3 рейс көтөрө былааннамытыттан, иккитэ оҥоһуллубута. Сөмөлүөт суол сабыллыбыт кэмигэр пассажир баар буоллаҕына көтүөҕэ”, — диэн бэлиэтээтэ.
Оттон «Управление автомобильных дорог РС (Я)» ГКУ производственнай-техническай салаатын начаалынньыга Олег Сенюшкин быйыл Төрүт нэһилиэгэр дылы муниципальнай суол өрөмүөнэ ыытыллыаҕа уонна Уус-Ньараҕа киин уулусса аспаалланыаҕа диэн иһитиннэрдэ.
Сиһилии “Хотугу сардаҥа” хаһыакка ааҕыҥ.
Любовь Кривошапкина
Ааптар хаартыскаҕа түһэриитэ