Өймөкөөн оройуонугар СӨ Бырабыыталыстыбатын отчуота олунньу 4-7 күннэригэр ыытыллыбыта.
Өймөкөөн куустатыгар үлэлээбит хамаанданы СӨ гражданскай оборонатын уонна нэһилиэнньэ олоҕо-дьаһаҕа сэрэхтээх буолуутун хааччыйыы миниистирин солбуйааччы Никита Павлов салайбыта. Отчуот кэмигэр Ил Түмэн Халыма-Индигирдээҕи уокуругун дьокутаата Евгений Слепцов улууска кэлэн, нэһилиэктэринэн сылдьыбыта.
Отчуот кэмигэр хас нэһилиэк аайы сытыы боппуруостар турдулар. Холобур, Томтор орто оскуолатын дириэктэрэ Алена Егорова таас чох күлэ хомуллубакка бөһүөлэги биир гына тарҕанан, дьон доруобуйатыгар буортулаах эттик тарҕанарыттан олохтоохтор дьиксинэллэрин туһунан аһаҕастык эттэ. Маны суһаллык хонтуруолга ылар уолдьаспытын, бу олохтоохтор хас даҕаны сыл устата туруорсар кыһалҕалара буоларын тоһоҕолоон бэлиэтээтэ.
Отчуоттуур тэрээһин кэмигэр доруобуйа харыстабылыгар, санрейстэри толорууга, тыа хаһаайыстыбатыгар, хаарбах дьиэттэн көһөрүүгэ, суол-иис туругар, үөрэхтээһиҥҥэ, олохтоох бүддьүөккэ, экологияҕа, ОДьКХ-ҕа, “Өймөкөөн” авиаплощадканы сөргүтүүгэ, тыа сиригэр сөмөлүөт сырыытыгар о.д.а. сыһыаннаах боппуруостарга тустаах министиэрэстибэлэр, департаменнар салайааччылара хоруйдары биэрдилэр.
СӨ бырабыыталыстыбатын отчуоттуур бөлөҕүн тыа сиригэр салайааччыта Никита Павлов дьоҥҥо туһаайан:
— Сыл аайы маннык көрсүһүүлэргэ кэлэн кыһалҕаларгытын туруорсаргыт саамай сөп. Мантан эһиги хаачыстыбалаах, туруктаах олохтоох буоларга кыһалларгыт, үчүгэйгэ тардыһаргыт көстөр.
Тырааныспар миниистирэ Владимир Сивцев үлэни бу курдук тэрийэр: кыбаартал аайы Боротокуолга киирбит этиилэртэн туох туолбутун, ханнык кыһалҕа быһаарыллыбатаҕын көрүү, ырытыһыы буолар. Ити курдук сыл устата үлэ былааннаахтык ыытыллар. Быйыл даҕаны үлэ бу хайысханан барыаҕа, норуот кыһалҕатын быһаарыыга күүстээх үлэ ыытыллыаҕа, — диэн отчуоттуур мунньахтарга эрэннэрдэ.
Бу туһунан сиһилии “Хотугу сардаҥа” хаһыакка сурулунна, онно ааҕаарыҥ.
Любовь Кривошапкина
Ааптар хаартыскаҕа түһэриилэрэ