Ол курдук улуус киинигэр “Металлург” Култуура дьиэтигэр сэтинньи 4 күнүгэр Уус-Ньара үлэ кэлэктииптэрин култуурунай-спортивнай спартакиадаларын уочараттаах этаба, национальнай куукуна быыстапка-дьаарбаҥката ыытыллыаҕа. Маны тэҥэ “Биһиги күүспүт – бииргэ буолууга!” диэн аһымал кэнсиэргэ улуус киинигэр түөлбэлээн олорор араас омуктар култуураларын уонна өбүгэ саҕаттан илдьэ сылдьар үтүө үгэстэрин көрдөрүөхтэрэ.
Сэтинньи 4 күнүгэр П.Я. Тулааһынап аатынан Төрүттээҕи сынньалаҥ киинигэр, А.Н. Громов-Агди аатын сүгэр Үчүгэй нэһилиэгинээҕи этно-култуурунай кииҥҥэ уонна “Тымныы Полюһа” Өймөкөөн сэлиэнньэтин кулуубугар уус-уран самодеятельность кыттыылаахтара аһымал кэнсиэрдэргэ олохтоохтору күүтэллэр.
Аартык бөһүөлэгэр “Биһиги күүспүт – бииргэ буолууга!” диэн оскуола оҕолоругар аналлаах патриоттуу өйгө-санааҕа иитэр чаас, Норуот сомоҕолоһуутун күнэ хаһан, хайдах ыытыллар буолбутун кэпсиир, устуоруйа бу кэрчигин арыйар көрдөрүү ыытыллыаҕа. Киэһэ улахан дьоҥҥо аналлаах “Доҕордоһуу киэһэтигэр” олохтоохтор мустуохтара.
Сэтинньи 8 күнүгэр Сордоҥноох нэһилиэгэр М.И. Заболоцкай аатынан култуура киинигэр аһымал кэнсиэр иитинэн көлүөнэлэр икки ардыларыгар “Култуура кустуга” диэн бэстибээл ыытыллыаҕа. Бу күн Томтор нэһилиэгэр үлэ кэлэктииптэрэ кыттыылаах аһымал тэрээһин буолуоҕа.
Аһымал тэрээһиннэртэн киирбит харчы-үп анал байыаннай дьайыыга сылдьар биир дойдулаахтарбытыгар ананар.
Бу — биһиги дойдубутугар олорор бары омуктар биир санаалаах, сомоҕо норуот буолалларын кэрэһилиир бырааһынньык. Кинилэр эйэ-дэмнээхтик биир дьиэ кэргэн буолан олороллоро, култуура, үөрэх, доруобуйа, билим, успуорт эйгэтигэр күнтэн күн үтүө ситиһиилэри, сайдыыны уһансаллара кэрэхсэбиллээх.
Любовь Кривошапкина