Өймөкөөн улууһун олохтоохторо соторутааҕыта күргүөмүнэн анал байыаннай дьайыыга ытык иэстэрин толоро сылдьар биир дойдулаахтарыгар анаан гуманитарнай көмө хомуйбуттара. Маныаха оҕолуун, улаханныын бары ылсыбыттара.
Хас биирдии нэһилиэккэ аһымал аахсыйалара тэриллэн, улуус үрдүнэн үтүмэн суума мунньуллан, биир дойдулаахтар тустарыгар анаммыта. Өймөкөөн улууһун дьаһалтатын официальнай дэлэгээссийэтигэр киирбит Сордоҥноох нэһилиэгин баһылыга Альберт Вензель уонна Уус-Ньара бөһүөлэгин баһылыгын солбуйааччы Николай Прокопьев сэтинньи бүтүүтэ ыраах сылдьар байыастарга төрөөбүт түөлбэлэриттэн эҕэрдэ, ас-үөл, наадалаах тэрил о.д.а. илдьэ барбыттара.
Анал байыаннай дьайыы зонатыгар сылдьыбыт Альберт Вензель бэҕэһээ Москуба куоракка кэлээт, сырыытын туһунан маннык иһитиннэрдэ:
— Биһиги биир нэдиэлэ устата Запорожьенан, Луганскай уонна Донецкай норуодунай өрөспүүбүлүкэлэринэн сылдьан, уолаттарбытын көрүстүбүт. Хомойуох иһин, барыларын көрсөр кыаллыбата: ким эрэ бойобуой сорудахха сылдьара, ким эрэ кыайан тахсыбата. Ол да буоллар кинилэргэ бииргэ сулууспалыыр дьоно дойдуларыттан истиҥ эҕэрдэ, баһыылка тиэрдиэх буолан эрэннэрдилэр. СВО зонатыгар тиийиэхпит иннинэ байыастар чопчу туох көмөҕө наадыйалларын биллэрбиттэрэ. Онон кинилэр сакаастарын — дроннары, тепловизордары, рациялары, бойобуой тиэхиньикэни дронтан көмүскүүр тэриллэри, аһы-үөлү, ону тэҥэ “Өймөкөөн” диэн гравировкалаах саха быһахтарын тиксэрдибит.
Альберт Вензель уонна Николай Прокопьев Москубаттан байыаннай дьайыы зонатыгар Ростовскай уобалаһынан киирэн баран, Курскай уобалаһынан тахсан кэллибит диэн кэпсээтилэр. Кинилэри прицептээх массыынанан СВО зонатыгар Саха сириттэн тиийэр дэлэгээссийэлэри өрүү таһар, көрсөр Ньурбаттан төрүттээх суоппар Алексей Николаев тиэйэ сылдьыбыт.
— Биһиги уолаттарбыт Өймөкөөн улууһун салалтатыгар, улуус дьонугар-сэргэтигэр барҕа махталларын, истиҥ баһыыбаларын тиэртилэр, — диэн түмүктээтэ Альберт Николаевич.
Любовь Кривошапкина