Бу туһунан улуус дьоно “Ыйыт – эппиэттиибит” рубрикаҕа ыйытан суруйдулар.
Биһиги улууспутуттан анал байыаннай дьайыыга сылдьар оҕолордоох ийэлэргэ «Мать солдата» диэн дастабырыанньа бэриллэр дуо? Оннук докумуоннаах дьон олохторугар-дьаһахтарыгар эбии чэпчэтиинэн, өҥөнөн туһаныахтарын сөбө буолуо. Биһиги улууспутуттан аҕыйаҕа суох эр киһи СВО-ҕа сылдьар. Ыал дьон син биир туох эрэ ыарырҕатар түгэнэ элбэх, олох оннук. Ордук сэмэй киһи бэйэтин кыһалҕатын иһигэр илдьэ сылдьара үгүс буолааччы.
Дария Тихомирова, биһиги общ. корр., Томтор
Ыйытыкка “Өймөкөөн улууһа” МО баһылыгын социальнай боппуруостарга солбуйааччы Прасковья Аммосова хоруйдуур:
— Өймөкөөн улууһугар 2022 сылтан анал байыаннай дьайыы кыттыылааҕын дьиэ кэргэнигэр Сибидиэтэлистибэ бэриллэр буолбута. Онон улуус маҕаһыыннарыгар, култуура тэрээһиннэригэр чэпчэтии көрүллэр. Оттон байыаннай комиссариат биэрэр дастабырыанньатынан СВО кыттыылааҕын чугас дьоно РФ иһигэр ханна баҕарар чэпчэтиинэн, өҥөнөн туһаныахтарын сөп.
Маны таһынан улууска анал байыаннай дьайыы кыттыылааҕар уонна кини дьиэ кэргэнигэр көмө оҥорор анал ыстаап үлэлиир. 2025 сылга уопсайа 46 анал байыаннай дьайыы кыттыылааҕын дьиэ кэргэнигэр 4 мөл. солк. суумалаах көмө оҥоһуллубута. Онон улууска СВО кыттыылаахтарын өйүүр үлэ былааннаахтык ыытыллар.
Былырыын улуус дэлэгээссийэтэ СВО зонатыгар икки төгүллээн сылдьан буойуттары көрсүбүтэ, гуманитарнай көмө илдьэн туттарбыта. Онно барытыгар 10 мөл. солк. тахса суумаҕа ас-таҥас, наадалаах тэрил о.д.а. ылыллыбыта.
Любовь Кривошапкина