Кырыа кыһын кэнниттэн
Кэрэ кэмнэр кэллилэр —
Сылам сааһы баттаһан
Сайын кэллэ мичийэн!
Сибэкки оһуорун тэлгэнэн
Сайыммыт сайбаччы киэргэннэ!
Салгына кытары мүөттэнэн,
Санааны сайгыччы көтөхтө!
Күөрэгэй көй үөһээ дьурулаан
Кэрэ кэм кэлбитин айхаллыыр!
Кэҕэбит кэрэкэ куолаһа
Күннэри-түүннэри чоргуйар.
Киэһээнэн түптэбит буруота
Кырдалга аргыыйдык налыйда…
Кыһынын умнуллар бэйэтэ
Кэрэ да сыттанан тунуйда!
Ыһыахха түһүлгэ тэриллэн
Ырыанан бар дьоммут түмүстэ!
Уйгулаах сайыны түстэһэн
Уруйдаан-айхаллаан сиэттистэ!
Симэхтээх бэрт кэрэ хотуттар
Сибэкки талыыта буоланнар —
Дьол-соргу чороонноох кымыһын
Дьоннорго күндүлээн ууннулар!
Уйгулаах сайыҥҥы күннэргэ
Эйэлээх олохпут эргийдин!
Ыччаппыт сэрииттэн төннүөхтүн,
Өрөгөй ырыабыт дьиэрэйдин!
Дьөгүөр Находкин, Төрүт
Махтанабын дьылҕабар
Махтанабын ийэлээх аҕабар,
Махтанабын Айыы Өбүгэлэрбэр,
Махтанабын сирбэр-уоппар,
Махтанабын ытык иччилэрбитигэр.
Орто туруу бараан дойдуга
Киһи буолан айыллан,
Олох очурдарын билээри
Кэлбиппит ыалдьыт буолан.
Махтанабын ааспыт олохпор
Таптал ырааһын билбиппэр,
Махтанабын дьылҕабар —
Икки кыталык кыргыттары бэлэх ууммуккар.
Тыа сирин олоҕо
Сарсыардааҥҥы саҥа күнү
Уруйдуу көрсөбүн.
Сибиэһэй сиккиэр салгын
Муннубар саба биэрэр.
Айылҕабыт сайыны аҕалан
Аргыый отун-маһын көҕөрдөр
Хойуу тыа быыһыгар
Кэҕэ этэн чоргуйар.
Сарсыардааҥҥы ыам буолан
Хороҕор муостаахтарбыт тиэтэйэн
Маҥыраһан, күө-дьаа буолан
Сүүрэн-көтөн кэллилэр.
Мария Никифорова-Арчыына, Сордоҥноох