Бу күннэргэ тыа сирин куустатыгар икки нэһилиэк хас да дьиэтин тиэргэнин уу ылан, ыксаллаах балаһыанньа үөскүү сырытта.
Хата, бу кэмҥэ Томтор нэһилиэгэр «Теплоэнергосевис» АУо генеральнай дириэктэрэ Максим Трофимов, СӨ Тырааныспарга министиэристибэтин уонна өрөспүүбүлүкэтээҕи Суол управлениетын эппиэттээх үлэһиттэрэ кэлэн, тустаах быһаарыылары ыла охсон, уустук балаһыанньа үөскээбэтэ.
Улуус баһылыгын э.т. Александр Иванов ааспыт нэдиэлэ саҥатыгар улуустааҕы ыксаллаах быһыы-майгы хамыыһыйатын, нэһилиэктэр баһылыктарын кытта мунньахтаан, миэстэтигэр былааннаах үлэ бара турбута. Онон кылгас кэм иһигэр тустаах салайааччылар дьону-сэргэни кытта бииргэ буолан, кыһалҕалаах боппуруостар уһаабакка-кэҥээбэккэ туоратылла оҕустулар.
Бу туһунан Томтор нэһилиэгин баһылыга Алексей Винокуров маннык иһитиннэрдэ:
«Теплоэнергосевис» АУо генеральнай дириэктэрэ Максим Трофимов бэйэтинэн кэлэн хочуолунайдар туруктарын, быйыл ититии тиһигэ тардыллар учаастактарын көрөн-үөрэтэн барда. Саҥа хочуолунай үлэтин алтынньы 15 күнүгэр түмүктээн, олоххо киллэрэр былааннаахтар. Оробуочай переулок уулуссатыгар 40 ыалы киин ититиигэ холбуохтаахпыт. Дьонтон сайаапкалары хомуйан, сайыны быһа наадалаах турбалары тиэйдибит. Икки сылы быһа саҥа хочуолунайы тутууга үлэлэспит дьыалабыт олоххо киирэн эрэриттэн үөрэбит. Этэҥҥэ буоллаҕына, алтынньы ортотуттан саҥа хочуолунай тигинэччи үлэлээн бардаҕына, Томтор нэһилиэгэ 100 % киин тиһиккэ холбонуоҕа.
Былырыын кыһын олус уустук эксээмэни ааспыппыт. Хаста да ититии тиһиктэрэ тоҥо сыыспыттара. Билигин Алдантан 350 м турба тиэллэн иһэр.
«Теплоэнергосевис» АУо генеральнай дириэктэрэ Максим Трофимов исписэлиистэрин кытта ОДьКХ эбийиэктэринэн сылдьан, ханна туох гаайка, тэрил тиийбэтиттэн саҕалаан, турбалары тардар сири барытын көрөн-истэн, үөрэтэн барда.
Онон балаҕан ыйын саҥатыгар 1 км ититии тиһигин турбата тардыллыахтаах. Сылаас ситэ тиийбэт сирдэригэр эбии турбалары туруоруохтара. Быйыл кыһыны быһа 60 кыраадыстаах тымныыга «Теплоэнергосервис» АУо исписэлиистэрэ кэлэн үлэлэспиттэрэ. Онон ханнык тустаах тэриллэр, тутуу матырыйааллара тиийбэттэрин барытын булан ыыппыттара.
Матырыйаал кэлээтин кытта, итиини биэрэр эбийиэктэргэ күүстээх үлэ ыытыллан, былааннаммыт үлэ түмүктэниэҕэ.
СӨ Тырааныспарга министиэристибэтин уонна Суол управлениетын салалталара исписэлиистэр биригээдэлэрин илдьэ кэлэн суол-иис, муоста тутуутун боппуруоһугар үлэлээн бардылар. Тырааныспар миниистирин солбуйааччы Анатолий Потапов быйыл сайын Томторго ыытыллыбыт 16-с өрөспүүбүлүкэтээҕи Олоҥхо Ыһыаҕар кураторынан ананан, биир ыйы быһа манна миэстэтигэр олорон үлэлээбитэ. Онон Томтору иккис дойдутун курдук саныыр буолан, туох кыһалҕалаахпытын барытын билэр.
Инньэ гынан, кинини кытта үлэлиир олус судургу. Бары боппуруостары холкутук кэмигэр быһаара охсор салайааччы. Бу да сырыыга Томтор уонна Сордоҥноох икки ардыгар айан суолун бэйэтинэн көрдө-иһиттэ. Кини сылдьар кэмигэр тохтоло суох ардах түһэ турар буолан, Куйдуһун үрэх олус улаатан турар кэмэ этэ. Онон поддон-муоста турар кыаҕа суоҕа. Ол иһин салайааччы мотуордаах оҥочонон сылдьан балаһыанньаны үөрэппитэ. САРМ муостаны алтынньыга туруорарга быһаарыы ылыннылар. Балаҕан ыйыгар анал биригээдэ кэлэн үлэлиир сирин таллыбыт. Онно анал тиэхиньикэлэрин туруоран үлэлиэхтэрэ.
«Өймөкөөн» өрөспүүбүлүкэтээҕи суол биир саамай кыһалҕалаах Наледнай учаастагар механизированнай муостаны оҥорон туруордулар. Итинник уу түһүөр диэри тустаах биэдимистибэлэр салайааччылара бу күһүҥҥү уустук тыҥааһыннаах балаһыанньаны көннөрөн бардылар.
Кырдьык, нэдиэлэ иһигэр айан суола харгыстары үөскэтэ, Сордоҥноох уонна Өймөкөөн нэһилиэктэригэр халаанныы сыыһан – олохтоох салалтаҕа тыҥааһыннаах кэм үөскүү сырытта. Хата, тустаах биэдимистибэлэр салайааччылара миэстэтигэр кэлэн көрөн-истэн, быһаарыы ылына охсон, ыксаллаах балаһыанньаны үөскэппэттилэр.
Өймөкөөн улууһун пресс-сулууспата