Бу күннэргэ оройуон нэһилиэктэрин баатсап-бөлөхтөрүгэр Сордоҥноох олохтоохторо Куйдуһун үрэҕи алдьаммыт муостанан сатыы туораан эрэллэрэ тарҕанна.
Кимэ биллибэт видео ааптара сордоҥноохтор сатыы туораабыт төрүөттэрин — мотуордаах оҥочо сылдьарын кэтэспэккэ (кылгас кэмҥэ үрэҕи туоруурга уу көлөтүнэн быстах сырыы тэриллибитэ) баралларын ыйбыта. Бу олус кутталлаах сорунуу. Аҕыйах түгэн иһигэр киһи алҕас халтарыйан эбэтэр хаппыт маһы сыыһа үктээн, уу анныгар баар буолан хаалыан сөп. Хаарыан олохтон матыы – хомолтото бэрт.
Биллэн турар, бастатан туран, биһиги бу боппуруоһу быһаарыан сөптөөх үрдүкү инстанциялар туох үлэни ыыталларын билиэхпитин баҕарабыт.
Ол сиэринэн, Ил Түмэн Халыма-Индигиирдээҕи уокуругун народнай дьокутаата, парламент сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин салайааччыта Сахамин Афанасьевтан бу тирээн турар боппуруос хайдах быһаарыллан эрэрин туоһуластыбыт.
Норуот дьокутаатын хоруйа
Мин дьокутаат быһыытынан СӨ Бырабыыталыстыбатын Бэрэссэдээтэлэ А.В. Тарасенко аатыгар сордоҥноохтор устубут видеоларын куоппуйатын сыһыаран туран, атырдьах ыйын 2023 с. 16 күнүгэр 24-4972 №-дээх официальнай суругу ыыппытым. Онно маннык этиллэр:
Убаастабыллаах Андрей Владимирович!
Мин аадырыспар Өймөкөөн улууһун Сордоҥноох нэһилиэгин олохтоохторо «Өймөкөөн» өрөспүүбүлүкэтээҕи айан суолугар понтон-муостаны туруоруу боппуруоһун туруорсубуттара.
2023 сыл от ыйын 12 күнүгэр Өймөкөөн оройуонугар халаан уутуттан Куйдуһун үрэҕи туоруур муоста эмсэҕэлээбитэ. Инньэ гынан, Сордоҥноох нэһилиэгин диэки туһаайыынан көлөнөн сырыы толору хааччахтанан турар. Нэһилиэк олохтоохторо күн бүгүнүгэр диэри айаннара харгыстанан, тустаах быһаарыыны ылары түргэтэтэргэ көрдөһөллөр.
Үөһэ этиллибиттэн сиэттэрэн, мин, Халыма-Индигир уокуругун олохтоохторун интэриэстэрин көмүскүүр СӨ норуотун дьокутаата, Томтор уонна Сордоҥноох нэһилиэктэрин икки ардыларыгар айан табыгастаах сырыытын хааччыйыы боппуруоһугар наадалаах дьаһаллары ыларгытыгар көрдөһөбүн.
Убаастабылы кытта, С.М. Афанасьев.
х х х
Ил Түмэн дьокутаата Сахамин Афанасьевы кытта тэҥҥэ тустаах министиэристибэ салайааччылара бу сытыы боппуруоһу быһаарыыга туох үлэни ыытылларын туһунан тустаах судаарыстыбаннай биэдэмистибэ пресс-сулууспатыттан сурастыбыт.
СӨ Тырааныспар уонна суол хаһаайыстыбатын пресс-сулууспатын хоруйа
2023 сыл от ыйын 12 күнүгэр дохсун ардахтартан Куйдуһун үрэх уутун таһыма эмискэ үрдээн, күүстээх сүүрүк “Өймөкөөн” өрөспүүбүлүкэтээҕи суолга турар мас муостаны икки аҥы урусхаллаан, сууйан кэбиспитэ.
Ыксаллаах быһыы-майгы куттала суох буолуутун хааччыйар сыалтан, тустаах үрдүкү инстанциялар Куйдуһун үрэҕи туоруурга понтон-муостаны туруоруу туһунан быһаарыы ылыммыттара. Билигин бу үлэни ыытыыга сөбүлэҥ докумуон илии баттааһыҥҥа сылдьар.
Маны таһынан, саахалланар туруктаах Сунтаар уонна Агаякан муосталарын кыһыҥҥы кэмҥэ САРМ муосталарга уларытар туһунан быһаарыы ылылынна.
Өймөкөөн улууһун дьаһалтата бастакы наадалаах табаары тиэрдэр сыалтан, Куйдуһун үрэҕи туоруурга уу суолунан сырыыны тэрийбитэ. Кыһыҥҥы кэмҥэ “Өймөкөөн” өрөспүүбүлүкэтээҕи суолун бу учаастагар быстах сырыыны хааччыйар САРМ муостаны туруоруу былааннанар.
Өймөкөөн улууһун пресс-сулууспата