Соторутааҕыта кыраайы үөрэтээччи, суруналыыс С.М. Егоров аатынан Төрүттээҕи бибилэтиэкэ ааҕааччылара бүтүн Арассыыйатааҕы кинигэ бэлэхтэһиитин күнүгэр аналлаах «Дарите книги с любовью-2025» диэн аахсыйаҕа кытыннылар.
Биһиги бибилэтиэкэбитигэр маннык аахсыйаны сылын аайы тэрийэн ыытабыт.
Быйылгы дьаһалга бибилэтиэкэ аҕам саастаах ааҕааччылара: Галина Григорьевна Горчакова, Акулина Ариановна Егорова, Тамара Моисеевна Босикова, Наталья Николаевна Атласова уонна Дьокуускай куораттан Сергей Егоров бииргэ төрөөбүт балта Фаина Афанасьевна Румянцева актыыбынайдык кытыннылар. Ону тэҥэ анаан-минээн дьиэ кэргэнинэн кэлэн, бибилэтиэкэҕэ кинигэлэрин бэлэх ууннулар нэһилиэкпит ытыктанар олохтоохторо У.В. Атласова, Л.В. Атласова, А.В. Атласова. Кинилэр дьиэ кэргэннэрин аатыттан оҕолорго аналлаах үтүөкэннээх саҥа кинигэлэри бэлэхтээтилэр.
Бу культуурунай-сырдатар аахсыйаттан Г.А. Кривошапкин аатынан Төрүт орто оскуолатын иллээх 2-с кылааһын үөрэнээччилэрэ (салайааччы В.О. Дьяконова) туора турбатылар, эмиэ кыттыстылар.
Биһиги нэһилиэкпитигэр үгэскэ кубулуйбут аахсыйа ситиһиилээхтик ыытылынна. Бэйэ-бэйэҕэ ис сүрэхтэн кинигэни бэлэх уунуу санааны көтөҕөр. Кумааҕы кинигэ былыр-былыргыттан баччааҥҥа диэри сыаннаһын сүтэрбэккэ кэллэҕэ уонна сыыппара аныгы үйэтигэр да күндүттэн күндү буолара кэрэхсибиллээх.
Бу бэлиэ күн көхтөөхтүк кыттыыны ылбыт ааҕааччыларбар бэйэм уонна бибилэтиэкэм аатыттан барҕа махталбын тиэрдэбин. Элбэхтэ ааҕыҥ, билиигитин-көрүүгүтүн хаҥаттыҥ уонна кинигэни арахсыспат аргыс оҥостуҥ диэн барыгытыгар баҕа санаабын тиэрдэбин.
Нина Чачуа,
бибилэтиэкэр, Төрүт