Тааттаҕа ыытыллыбыт күрэс төрүт көрүҥнэригэр “Манчаары оонньуулара-2025” чэрчитинэн күрэстэһиилэр эрэ буолбакка, култуурунай тэрээһиннэр эмиэ быыстала суох ыытыллыбыттара. Ол курдук уопсайа 69 араас көрүҥҥэ дьону сынньатар уонна аралдьытар тэрээһиннэр үрдүк таһымҥа ааспыттара.
Мин Ытык-Күөлгэ саҥа аһыллыбыт сынньалаҥ пааркатыгар сылдьан, аныгылыы тутуулаах павильоннарга уран тарбахтаах дьон быыстапкаларын дуоһуйа көрбүтүм-истибитим.
Онтон саамай сэҥээрбитим диэн, таатталар дойдубутугар, Саха сиригэр, үүнэр эмтээх үүнээйилэри үөрэтиигэ ураты болҕомтолорун ууран, маныаха оҕолору эмиэ уһуйбуттар. Кинилэр эмтээх отторун хатаран, бэртээхэйдик табаарынай көстүүлээх гына оҥорон атыыга хамаҕатык таһаараллар эбит.
Маны тэҥэ “Тааттаҕа оҥоһуллубута” диэн быыстапка дэлэччи тардыллыбыт этэ. Манна павильоннар аныгылыы истиилинэн олус тупсаҕайдык, сонуннук оҥоһуллубуттара тута киһи хараҕар быраҕыллар. Хас биирдии павильон тус-туһунан норуот уус-уран айымньытын көрдөрөр аналлаах. Холобур, худуоһунньуктар үлэлэрин, кылтан-сиэлтэн, мастан-талахтан, туостан, таастан оҥоһуктар, эмтээх оттор быыстапкалара үгүс ыалдьыт болҕомтотун тардыбыта саарбаҕа суох.
Баайаҕалар павильоннарыгар Б.Ф. Неустроев-Мандар Уус бэйэтин олоҕун кэрчиктэрин хаҥас илиитинэн олус үчүгэйдик уруһуйдаабыта үгүс дьон сэҥээриитин ылла. Мандар Уус уруһуйдарыгар олоҕор көрсүбүт түгэннэрин, истибит чахчыларын, олоххо анаарыларын ойуулаабыт.
Бу курдук Борис Федорович күн бүгүнүгэр, 80 сааһыгар диэри, айа-тута, уруһуйдуу сылдьара олус кэрэхсэбиллээх. Кини 150 уруһуйу оҥордоҕуна үлэтин барытын холбоон, таатталар кинигэ онорон таһаарар былааннаахтарын сэргии иһиттим.
Бу курдук, ыалдьыттар Тааттаҕа сылдьан улуус талба талааннаахтарын кытта алтыһан, кинилэр ураты үлэлэрин көрөн-истэн олус астынныбыт, үтүө уопут быһыытынан ылынныбыт.
Мария Максимова, улуустааҕы Култуура управлениетын үлэһитэ, Таатта, Ытык-Күөл