Мин быйыл Саха сиригэр Култуура, Өймөкөөн улууһугар Култуура уонна Үтүө үгэстэр сылларын чэрчитинэн эдэр уһуйааччы, Томтордооҕу В.П. Кривошапкин аатынан Оҕо ускуустубатын оскуолатын уруһуй учуутала Нина Егорованы туһунан суруйарга сананным.
Нина Егорова Ньурба улууһуттан төрүттээх.- Төрөппүттэрим миэхэ ускуустубаҕа тапталы иҥэрбиттэригэр махталым муҥура суох, — диэн санаатын үллэстэр билигин Нина. Биэс бииргэ төрөөбүттэртэн (биир уол уонна түөрт кыыс) кини уруһуйдуурун кыра эрдэҕиттэн олус сөбүлүүрэ.
Нина Ньурбачаан орто оскуолатын бүтэрэн баран, Намнааҕы педагогическай колледж уруһуй, черчение салаатыгар үөрэххэ киирбитэ. Манна үөрэнэ сылдьан, кини олоҕун аргыһын Сергей Егоровы көрсөн, сүрэхтэрин олохтообуттара. Эдэр дьон иккиэн үөрэхтэрин бүтэрэн баран, Томтор орто оскуолатыгар үлэлии кэлбиттэрэ. Нина Егоровна учууталлыы сылдьан Саха судаарыстыбаннай педагогическай академиятын ойуулуур-дьүһүннүүр ускуустубатын салаатыгар кэтэхтэн үөрэнэн, үрдүк үөрэҕи баһылаабыта.
Онтон ыла, 2012 сыллаахтан, кини Томтордооҕу Оҕо ускуустубатын оскуолатыгар уруһуй учууталынан айымньылаахтык үлэлии-хамсыы сылдьар. Нина Егоровна салайар кылааһыгар күн бүгүн 20-тэн тахса оҕо дьарыктанар. Кини кэрэҕэ уһуйар үөрэнээччилэрин ситиһиилэрэ үгүс. Ол буолар, учуутал сыралаах үлэтин сүрүн түмүгэ, салгыы сайдарга кынаттыыр төрүөтэ.
2019 сыллаахха Егоровтар дьиэ кэргэҥҥэ күүтүүлээх кыыс оҕо — Кияра күн сирин көрбүтэ. Кыракый кыысчаан Томтордооҕу «Кэскил» уһуйаан иитиллээччитэ, дьонун утумнаан талаана арыллан иһэр уонна билиҥҥиттэн араас тэрээһиннэргэ көхтөөхтүк кыттар.
Егоровтар эдэр ыал айар-тутар талааннара өссө да сайда, элбэх үөрэнээччилэри кэрэ эйгэтигэр угуйа турдуннар диэн баҕа санаабын тиэрдэбин.
Бу туһунан сиһилии “Хотугу сардаҥа” хаһыакка ааҕыҥ.
Надежда Литвинцева, кыраайы үөрэтээччи, Томтор