Соторутааҕыта Сордоҥноох нэһилиэгэр хас даҕаны бэлиэ түгэн тосхойдо. Ол курдук манна нэһилиэк устуоруйатын кэрэһилиир, үтүө үгэстэрин, баараҕай нэһилиэстибэтин харайар соруктаах тыа сирин мусуойа үөрүүлээх быһыыга-майгыга аһылынна.
Мусуойу арыйыы сиэригэр-туомугар ыҥырыылаах ыалдьытынан Саха Өрөспүүбүлүкэтин култууратын Бочуоттаах үлэһитэ, култуура туйгуна, кыраайы утумнаан үөрэтээччи Розалия Тимофеевна Дягилева буолла.
Түмэл мантан антах Сордоҥноох нэһилиэгэр норуот дууһатын, тылын, сиэрин-туомун уонна устуоруйатын сүтэрбэккэ сылдьар тыыннаах ситиминэн буолуо турдаҕа.
Нэһилиэк олохтоохторугар култуура сылыгар аныгы LED-экраны олохтооһун өссө биир үөрүүлээх түгэнинэн буолла. Саҥа экраны ылыыга нэһилиэнньэ тус кылаатын киллэрбитэ өссө үрдүктүк сыаналанар.
Ол курдук бу дьыала кинилэр олохтоох көҕүлээһини өйөөһүн (ППМИ) бырагырааматыгар көхтөөхтүк кыттыбыттарын түмүгэр ситиһилиннэ.
Ольга Скрыбыкина