Кини култуура кэрэ эйгэтигэр олоҕун аҥаарын анаабыт, Өймөкөөн улууһугар култуура сайдыытыгар сүҥкэн кылаатын киллэрсибит дьонтон биирдэстэринэн буолар.
РАИСА Давыдовна Скрыбыкина (Гаврильева) Мэҥэ- Хаҥалас оройуонугар элбэх оҕолоох дьиэ кэргэҥҥэ күн сирин көрбүтэ.
Ийэтэ Гаврильева (Николаева) Надежда Никитична ( 1924-2004), аҕата Гаврильев Давыд Егорович (1924-1960) уопсайа 8 оҕолоохторуттан — 3 уол уонна 5 кыыс.
Раиса Давыдовна бииргэ төрөөбүт убайын Гаврильев Михаил Давыдович уола — Гаврильев Иннокентий Михайлович-Лэкиэс (1972-2025). Санатар буоллахха, Лэкиэс “Төҥүлү эбэм” диэн бастакы ырыатын 1989 сыллаахха суруйбута. Барыта 30 ырыалаах, “Аартык ” айар студия, “Дапсы” бөлөх салайааччыта, “Маэстро-2007” куонкуруска “Бастыҥ аранжировщик” аатын ылбыта. Кини Саха Өрөспүүбүлүкэтин үтүөлээх диэйэтэлэ, СӨ култууратын туйгуна этэ.
Раиса Давыдовна 1966 сыллаахха Төҥүлүтээҕи орто оскуола кэнниттэн Дьокуускайга култуура-сырдатар училищетын бүтэрэн баран, 1968 с. Өймөкөөн оройуонун Томтор нэһилиэгэр ананан үлэлии кэлбитэ.
ОЧЧОЛОРГО Томтор кулуубугар Ильинов Николай Петрович — салайааччы, Винокурова (Николаева) Мария Николаевна уус-уран салайааччы этилэрэ, Раиса Давыдовна инструкторынан анаммыта. Бу дьоҕус айар бөлөх ситиһиилээхтик үлэлээн, 1976 сыллаахха I Бүтүн Сойуустааҕы бэстибээлгэ самодеятельнай кэлэктииптэр күрэхтэригэр сыаналаах бэлэҕинэн бэлиэтэммитэ.
1971 сыллаахха Р.Д. Скрыбыкина Томтордооҕу оройуон бибилэтиэкэтигэр бибилэтиэкэринэн үлэлии киирбитэ. Бу кэмҥэ тэрилтэҕэ Прокопьева Полина Степановна — сэбиэдиссэй, Шеина Тамара Гаврильевна, Егорова (Стручкова) Евдокия Семеновна бибилэтиэкэр этилэрэ.
1980 сыллаахха Томтордооҕу бибилэтиэкэ киин библиотечнай тиһиккэ киирбитэ, онно Раиса Давыдовна комплектование салаатын эрэдээктэринэн үлэлээбитэ. 1988 сыллаахха кини үлэ бэтэрээнэ буолбута, 1991 сыллаахха Култуура министиэристибэтин «Туйгун үлэтин иһин» диэн бэлиэтинэн наҕараадаламмыта.
РАИСА Давыдовна 2021 сыллаахха “Тыа сирин култууратын бастыҥ үлэһитэ”, “2-с Бороҕон бочуоттаах олохтооҕо” буолбута уонна 2024 сыллаахха “Култуура туйгуна” аакка тиксэн үөрбүтэ-көппүтэ.
Кини кэргэнэ Скрыбыкин Иннокентий Дмитрьевич (1948-2020) идэтинэн зоотехник этэ. Кэргэнниилэр икки оҕолоохтор, кыыстара Торговкина Сардаана Иннокентьевна — түөрт оҕолоох ийэ, олоҕун аргыһа — Торговкин Гаврил Гаврильевич. Уоллара Скрыбыкин Иннокентий Иннокентьевич — биэс оҕолоох аҕа, кэргэнэ — Попова Татьяна Митрофановна.
Тапталлаах ийэ, эйэҕэс эбэ Раиса Давыдовна Скрыбыкина билигин даҕаны үтүө суобастаахтык уонна ситиһиилээхтик Томтордооҕу култуура дьиэтигэр үлэлии сылдьар.
Надежда ЛИТВИНЦЕВА,
Томтор
Сиһилии «Хотугу сардаҥа» хаһыакка ааҕыҥ