«Күбэйэҕэ» эдэр ийэлэр түмсэллэр

Арассыыйаҕа — Дьиэ кэргэн, Саха сиригэр — Оҕо сылларын чэрчитинэн дойдуга уонна республикабытыгар оҕо аймахха, дьиэ кэргэҥҥэ аналлаах араас хайысхалаах тэрээһиннэр ыытыллаллар.  Өймөкөөн нэһилиэгэр эдэр ийэлэр «Күбэйэ» диэн түмсүүлэрэ быйыл үлэлээбитэ номнуо бэһис сылыгар барда.

2019 с. тэриллибит түмсүүгэ 18 эдэр ыал ийэлэрэ мустан, араас хабааннаах тэрээһиннэри ыыталлар, үгүс дьаһалларга көхтөөхтүк кытталлар. Түмсүү бастаан тэриллэригэр сүрүн сыала-соруга – оҕо көрөн олорор ийэлэри түмэн, кинилэр сөбүлүүр дьарыктарын, идэлэрин сайыннарарга, олоххо көхтөөх буолалларын туһугар араас тэрээһиннэргэ кытыннарарга, дьиэ кэргэҥҥэ оҕолору кыра эрдэхтэриттэн кинигэни ааҕыыга сыһыарыы этэ.

Оттон билигин бу түмсүүгэ баар ийэлэр бэйэлэрэ араас хайысханан интэриэһинэй маастар-кылаастары, оҕолорго  аналлаах тэрээһиннэри ыыталлар, сылын аайы субботунньуктарга актыыбынай кыттыыны ылаллар.

Түмсүүгэ анаан кинилэр «Күбэйэ» диэн түмсүүлэрин аата суруллубут футболкалары сакаастаан оҥотторбуттара. Уопсастыбаннай тэрилтэ бэрэссэдээтэлэ 2019 сылтан ыла  Өймөкөөн нэһилиэгин бибилэтиэкэрэ Ньургуйаана Дьяконова буолар. Кини үс оҕолоох ыал ийэтэ, эдэр ийэлэргэ үтүө холобур буолар киһи.

Быйыл дьиэ кэргэн уонна оҕо саас сылларынан «Күбэйэ»  күн күбэй ийэлэрин элбэх үлэ, тиэмэтиичэскэй тэрээһин былааннаммыта. Соторутааҕыта Аан дойдутааҕы дьиэ кэргэн сылыгар анаммыт бырааһынньыктааҕы тэрээһин буолбута. Бу күн 12 эдэр көхтөөх ийэлэр кырачаан оҕолорун илдьэ кэлэн, олус сэргэхсийэн, Өймөкөөн орто оскуолатын психолог идэлээх Ирина Сивцева оҕону иитиигэ сүбэлэрин истэн, араас элбэҕи билэн-көрөн, үөрэн-көтөн дьиэлэригэр тарҕастылар.

Аны биир соруктарынан Дьиэ кэргэн уонна Оҕо аймах сылыгар туһуламмыт биир сэргэх дьаһал — эдэр ийэлэр оҕолорунаан төрүччүлэрин оҥорон, сыл түмүгэр куоталаһыы тэриллэрэ барыларын күүтэр.

Мария ГЕРМОГЕНОВА

Хаартыскалары тиксэрдэ

Ньургуйаана Дьяконова

 

Читайте дальше