Бу сайыҥҥы былдьаһыктаах күннэргэ Өймөкөөн улууһугар сайын саҕаланыаҕыттан ититии тиһиктэрин саҥардыы уонна хочуолунайдарга хапытаалынай өрөмүөн ыытыллар.
— “Теплоэнергосервис” ААУо улуустааҕы филиала 14 хочуолунайы уонна 60 км тахса уһуннаах ититии тиһигин көрөр-истэр, — диэн быһаарар тэрилтэ Өймөкөөн улууһунааҕы салаатын дириэктэрэ Максим Ямщиков. – Кэлиҥҥи уонча сылга улуус бары нэһилиэнньэлээх пууннара итиинэн толору хааччыллыылаахтар. Кинилэр бука бары киин ититэр тиһиккэ холбонон олороллор, саҥа хочуолунайдар тутуллан.
Салайааччы бэлиэтээбитинэн, кыстыкка бэлэмнэнии хампаанньатыгар үлэһиттэр биир сүрүн сыалларынан ититии тиһигин өрөмүөннээһин буолар. Бу күннээххэ Аартык бөһүөлэгэр үс сиринэн ититии тиһигин уларытан бүтэрдилэр.
Томтор сэлиэнньэтигэр өрөмүөн үлэтин 50 бырыһыана оҥоһуллубут.
Ити курдук улууска «Теплоэнергосервис» олох-дьаһах коммунальнай хаһаайыстыбатыгар өрөмүөн үлэтэ былааннаахтык ыытыллар, кэлэр кыстыкка бэлэмнэнии көхтөөхтүк барар.
Бу туһунан сиһилии “Хотугу сардаҥа” хаһыакка ааҕыҥ.
Биһиги корр.