Арассыыйаҕа бэлиэтэнэр юрист күнүн чэрчитинэн сокуон эйгэтигэр олоҕун анаабыт юрист медиатор идэлээх Анна Березкиналыын көрсөн, үлэтин-хамнаһын туһунан кэпсэттибит. Кини Өймөкөөн оройуонугар дьиэ кэргэн сыһыана бөҕөргүүрүн туһугар бэйэтин сэмэй кылаатын киллэрэр дьонтон биирдэстэрэ.
— Үтүө күнүнэн, Анна Дмитриевна. Кэпсэтиибитин юрист медиатор диэн кимин быһаарыыттан саҕалыахха.
— Юрист медиатор — мөккүөрү, этиһиини, өйдөспөт буолууну эйэ-дэмнээхтик быһаарар исписэлиис. Кини дьиэ кэргэни кытта үлэлэһэр, сүрүннээн, арахсыыны утары үлэни ыытар.
— Анна Дмитриевна, аҕааччыларга юрист идэтигэр хайдах кэлбитиҥ туһунан сырдатыан буолаарай?
— Мин Красноярскайдааҕы юридическай техникуму бүтэрэн баран, 1989 сыллаахтан Дьокуускайдааҕы суут сэкирэтээринэн үлэбин саҕалаабытым. Дьокуускайдааҕы суут туһаайыытынан М.К. Аммосов аатынан Саха судаарыстыбаннай университетыгар юридическай салааҕа үөрэнэ киирбитим. Ол гынан баран дьиҥнээх идэбинэн «Сахафармация» судаарыстыбаннай унитарнай тэрилтэҕэ юрисконсультанынан (быраап боппуруостарын быһаарар юрист) үлэлээбитим. Кэлин баан юриһын дуоһунаһыгар үлэлээммин элбэх ситиһиилэммитим.
— Кэргэнниилэр арахсыылара ордук туохтан тахсар дии саныыгыный?
— Бүтүн Арассыыйатааҕы Уопсастыба санаатын үөрэтэр киин (ВЦИОМ) учуонайдара аныгы үйэҕэ, хомойуох иһин, кэргэнниилэр арахсыыларын буолуохтааҕын курдук ылар көлүөнэ үөскээбит диэн бэлиэтииллэр. Кэргэннии уонна төрөппүт буолар — чэпчэки суол буолбатах. Төрөппүттэргэ элбэх быраап бэриллэр уонна сүҥкэн эппиэтинэс сүктэриллэр. Билиҥҥи олоххо ыал арахсыыта материальнай өттүгэр наhаа охтор, онон, хомойуох иhин, кэргэнниилэр арахсыылара сыл аайы эбиллэ турар.
— Эһиги дьиэ кэргэҥҥэ, оҕону иитиигэ тугу сүбэлиигитий?
— Олох түргэнник сайда турар кэмигэр дьиэ кэргэттэргэ сокуонунан көрүллэр быраапкытын уонна эбээһинэскитин толору тутуһарга үөрэниҥ. Сокуонунан көрүллэр бэйэҕит быраапкытын, оҕо быраабын билиэхтээххит. Маны толору туһанан, ким да бырааба кэһиллиэ, күөмчүлэниэ суохтаах.
— Юрист идэтин баһылаан эрэр эдэр ыччакка тугу сүбэлиэҥ этэй?
— Эдэр көлүөнэ юристарыгар гражданскай мөккүөргэ дириҥ өйү-санааны ситиһэллэригэр, дьиэ кэргэттэригэр өйдөһүүнү уонна тапталы, үлэлэригэр бэриниилээх буолууну, дьулууру, ситиһиилэри баҕарабын. Билиигит-көрүүгүт таһымын мэлдьи үрдэттэ сылдьыҥ диэн сүбэлиибин.
Сиһилии «Хотугу сардаҥа» хаһыакка ааҕыҥ
Евдокия ЕГОРОВА